Follow us Youtube Rss Twitter Facebook
قديم 11-18-2013, 01:58 AM   #1
لينا بنت كامل
عضو مشارك
 
تاريخ التسجيل: Aug 2013
الإقامة: sudan
المشاركات: 60
يوميات شخوص عاديين



يوميات دكتوره فدوى
أعادت تعديل الخمار الذي يزيين وجهها الجميل..
أدخلت يداها في جيوب ال"لاب كوت"
اليوم بارد جدا.. ولكنها تشعر بالجوع..توقفت قليلا أمام "الكشك" الذي يقع بجانب المشفي..
هي : صباح الخير ياعم عبدالله..
هو بإبتسامته المعتادة:صباح الخير يا دكتورة .. كيف مع البرد دا..
هي : والله يا عمو .. تعبنا عديل كدا .. لازم نطلع بدري عشان المواصلات..
ومرات بيكون عندنا "شفت" بالليل ف بنضطرا نبيت في المستشفي ..غايتو بس ربنا يعين
هو : آمين يا بتي .. الليلة العصير البتحبيهو ماجا..
هي: كيف الكلام دا؟؟ لييييه يعني ..؟ أول أمبارح برضو ما جابوهو..
هو:والله يا بتي بيني وبينك.. شكلهم دايرين يرفعو سعرو ..
هي: تااااااني؟؟ قبل إسبوعين بقا بي جنيهين..
كان ما عصير كحيان ..حسبي الله ونعم الوكيل.. الواحد ماعارف البلد دي ماشة وين..
خلاص ياعم اديني أي عصير وكيكه..الليله جعانه من الصباح..
يناولها ما طلبت .. تذهب دون أن تدفع.. ويضيف هو ارقاما بجانب إسمها علي دفتره الصغير..
وقفت في إنتظار ذهاب السيارات .. حتي تمر
ركبت سماعات الأذن .. وصارت تدندن مع الأغاني ..
وهي تشرب من العصير.. كانت تسمع أصوات اشخاص يتحدثون.. إلتفتت إلي الوراء.. شلة من الشباب .. يتبطلون بجانب " ست الشاي"
يتضاحكون ويتغامزون..
الشاب واحد:لااااا العسل دا كلو ينتظر العربات..
ياخ ناس العربات ديل حمير خلاس.. أ كان أنا سايق بقيف أخليها تمر..هي بينها وبين نفسها ..
"أها عشان عوالقيك دا ما بتسوق"
الشاب اتنين:
عسل عسل .. في منقا بتشرب منقا؟بينها وبين نفسها"حاسه انو مرارتي اتفقعت.. دي شنو الخلق دي من الصباح كدا"وتنفخ بقوة
هم.. يقهقهوا ضاحكين
هي .. تسرع في المرور .. وتدخل المستشفي مسرعه.. متعديه الإستقبال دون أن تسلم .. علي غير العادة..
سجلت إسمها .. ثم أمسكت الهاتف :
ألو .. يا زفته إنتي وين ياخ.. آها الإستراحة؟؟.. آي جيت
تتجه إلي مكان صديقتها وإبنة الجيران معا..
تدفع باب الإستراحه بخشونه..
هي:ياخ صحبة السواد.. ليييه فتيني ياخ.؟؟ ماتقولي صحبة عمري دي بعدين حتتشحطط وروحا تمرق في المواصلات والبرد.. دا غير الصيع اليكرهوك المواصلات..وللا عشان اخوكي بقا يجيبك ويوديك .. استغنيتي عني؟؟
آلاء: لا حولا.. طول عمرك هوالة وبتكبري المواضيع.. أديتيني محاضرة كاملة..
بدال تتفاصحي ابقي ردي علي تلفونك .. وبعدين حضرتك نايمة زي البقرة.. وانا منتظراكي ساعة وبتصل وما بتردي..اعمل ليكي شنو..؟؟وبعدين اخوي دا.. في ايدك يوصلك ويوديكي محل ما دايرة انتي الأبيتي
هي تقترب مقبلة صديقتها: خلاص سماح.. طلعتا انا الغلطانه..بالله اخوكي المعقد دا ماتجيبي لي سيرتو.. قال أقعد في البيت.. ياخ النسوان سافرو القمر .. وسي السيد داير يقعدني في البيت.. أتعب واشقي وامتحن شهاده.. وادخل طب.. واتهري سته سنه قراية وامتحانات وكورسات وحسة امتياز وخدمه عشان اجي اقعد في البيت.. ؟؟ خلي يتلهي أول..
آلاء: ههههههههههههه هوي دا أخوي ومابرضي فيهو ..مع انو علي قولك معقد..وتغير الموضوع
اها انشالله لقيتي مواصلات بي سرعه؟
هي: بالله في البلد دي في زول بلقا حاجة بسرعه..
اتشحطتا وروحي مرقت..وركبتا جمب واحد أجارك الله .. لا يقول الدنيا صباح لا يقول الآنسة القاعده جمبي دي.. ينفخ في السيجاير قرب يجيب لي أزمة.. دا غير الوراي .. شغال يجدع لي ورقه مكتوب فيها رقمو.. هو يجدع وانا ارجعا هو يجدعا وانا ارجعا.. كرهني الحافله..آلاء تضحك.. : إتخيلتا منظركم..
هي : وكمان جيت اشتري العصير من عمو عبدالله.. أنا وجايه علي هنا .. دايرة أقطع الظلط..شلة صيع كدا قعدين جمب ست الشاي.. شغالين يعاكسوا فيني ..ما احترموا اللاب كوت حتي..
آلاء تضحك: يا بت انتي قايلة نفسك وين..؟ديل بيشاغلو اي كائن بينتهي بالتاء المربوطه..
دكتورة.. منقبه .. شابه .. شافعه .. كبيرة آي شي..
أنثي والسلام..
هي: نفسي أعرف بيستفيدو شنو..؟
آلاء:
فراغ.. متعه.. دايرين يشوفو ردة فعلنا..
فدوى : الله يهدي غايتو..وكلو كوووم و"في منقا بتشرب منقا دا كوم تاني.." ياخ دي من زمن النبي صبي خلوها ..وكمان خلي يمشي يرفع بنطلونو أول بعدين يجي يتكلم..آلاء تضحك..
هي تكمل: كان شفتي .. منزل البنطلون.. مافهمتا دا شنو؟؟ دا غير السلاسل .. والخواتم.. وكمان شعرو زي الغراب يا هناية .. منفشو ليك فووووق وحالق نصو..آلاء تضحك مرة أخري: دي الموضة يا صحبتي.. الناس بقت هي البتواكب الموضه .. بدال ما الموضه تواكبهم.. مستعدين يعملو اي شي عشان يظهرو.. العجب البنات..
فدوي: البنات من زمان دي حركاتهم.. لكن الأولاد بقو ببالغو ياخ..
آلاء: طيب يافيلسوفه خلينا نمر علي المرضي ديل.. حيموتوا في سرايرهم واحنا شغالين نحلل المجتمع السوداني
ويقطعان الجديث وتتجهان كل إلي مرضاها..
فدوي تدخل الغرفة.. رقم مئتان.. وتندهش بالكم الهائل.. وبينا وبين نفسها .. إستعنا علي الشقي بالله.. حسا دي غرفة وللا فندق ولا كوافير ماعرفتا..شي كراتين وشي رجال وشي شفع ونسوان بترضع شفع .. وشي موز وشي قشر فواكه..
هي: دا شنو يا جماعه ؟؟ معليش الزيارة ممنوعه.. إنتو دخلتو هنا كيف؟ معليش لازم تطلعو بره خلونا نكشف علي المريضة..
وما ان أنهت جملتها.. إنتفض في وجهها الرجال قبل النساء..
رجل واحد: إحنا المدير "بكسر الميم" أدانا ورقة قال تدخلوا..
هي: المدير أكيد قصدو اتنين تلاته .. ماقال تجيبو الحله كلها.. معليش ياعم أطلعوا خلونا نشوف شغلنا..
أم العم: عم في عينك.. عاين البايرة دي عليك الله..
شاب اتنين:
عليك الله آي زول الزمن دا بقا دكتور.. ويجيبو لينا آي زول يلبسو البتاع الأبيض دا ويدي يتفلسف علينا..
هي: البتاع الابيض اسمو لاب كوت .. ولو سمحتا ماتخليني اجيب ليك ال " سكيوريتي"
وبعد شد وجذب .. خرج الجماعه الزوار..
هي مسكت السماعه.. كشفت..
ثم: أها يا خاله .. الليلة كيفك.. انشالله احسن؟
المريضه:
آآخ يا بتي أحسن بي وين.." الدغت" إرتفع علي يابتي قربتا أموت..
هي:ضغط شنو ياخاله .. ماعندك اي شي..إنتي حسه تمام..
المريضه: تمام شنو.. الدوخه دي من شنو؟ شكلي جاني السكري.. خلي يجيبو لي البرطمانية ديك نديكم عينه تشوفي لي .. انا شاكة في السكري..
هي: يا خاله استهدي بالله سكري شنو.. إنتي مش قلتي انو حلقك واجعك؟ ومع انو ماعندك اي شي اصريتي يشيلوها ليكي..وشلناها .. بعد دا امشي بيتكم..
المريضة بغضب:امشي بيتكم انتي دي.. شافعه ما بتعرف .. دايرة تكتليني.. ؟ اقول ليكي الدغت والسكر مرتفعات علي ..تقولي لي أمشي؟
هي بصبر ..: خلاص ياخالة حأكتب ليك دوا مهم .. بس لازم تاخديهو صباح ومسا.. اوعك تنسي..
ثم تحمل الدفتر وتكتب إسم حبوب معطرة للفم .. وتثني الوقه بحرص وتناولها للمريضه وتغادر
تمر علي المريض الثاني..
شاب .. في منتصف العمر.. بكلية تالفه.. مستلقي علي السرير بتعب.. والممرضة .. تعطيه المحلول..
هي تدخل فجأه والممرضه ترتبك وتضع يدها خلف ظهرها..
هي: صفاء.. بتعملي في شنو..؟
الممرضه: د. فدوي كيفك تمام.. كنتا بدي المريض الدوا.. في حاجه؟
هي: ودا شنو الورا ضهرك دا؟؟
لاحظت أن المرض علي وشك أن يصحو فهمست: بعدين بوريكي.. أسكتي هسي
وأسرعت بالركض إلي الخارج..
أتمت مرورها علي كل المرضى .. وطبها الفضولي جعلها تبحث عن صفاء.. وجدتها جالسة مع مجموعه من الأطباء الجدد .. أسرعت إليها ..
صفاء تعالي دايراكي دقيقه..
صفاء : ثواني وبجيكي يا دكتورة..
هي: قلنا تعالي ..
ثم سحبتها إلي الإستراحه..
هي: أها وريني كنتي بتعملي شنو قبيل؟
صفاء تدخل يدها في جيبها وتخرج قناني دواء صغيرة ..
فدوى تنظر للقناني:موية مقطرة.. ؟ داشنو؟ ليه بتدي المريض مويه مقطرة..؟ في زول قال ليكي كدا؟ هي: لأ عارفه فتايل الدوا حقتو بي كم؟
ميه وخمسين جنيه.. وعارفاهو بيخاد كم وحده في اليوم؟؟
عارفا انو شكلو ميت ميت.. فبشتري الدوا حقو.. وابدلو بالمويه دي كلها بي كم..
فدوى تشعر بالذهول واللإشمئزاز والغضب.. وتصرخ: انتي مريضه. ؟ انتي مجنونه. ؟ دا شنو ؟؟ انا حخرب بيتك والله .. حاكلم المدير واخليهو يطردك.. انتي ما تستاهلي تكوني ممرضه..
صفاء تضحك بقوة: هههههههههههه اها وتاني؟؟ والله انتي المريضه.. فكرك المدير ما عارف؟ احنا هنا اسرة مترابطه مع بعضينا..وكلنا شغالين كدا.. هي: مستحيل اصدق.. إنتو ماعندكم ضمير؟؟ وين القسم ؟ وين الرحمه.
صفاء تضحك : والله إذا فتحتي خشمك بي كلمة .. وما اشتغلتي معانا إنتي الحتلقي نفسك في الشارع.. يا أم الضمير
وتذهب ضاحكة.. تاركة فدوى مذهولة...
لو كنتا محل فدوي تعمل شنو.؟
لينا بنت كامل غير متصل   رد مع اقتباس
قديم 11-18-2013, 02:07 PM   #2
القوني
عضو مُـميز جداً
 
تاريخ التسجيل: Feb 2010
المشاركات: 5,881
حأدق الصعاليك الشاغلوني في الشارع.
التوقيع
للتاسع من يوليو القادم تبقتْ ألفا قصة فقط لك يا وطن
القوني غير متصل   رد مع اقتباس
قديم 11-19-2013, 12:46 AM   #3
لينا بنت كامل
عضو مشارك
 
تاريخ التسجيل: Aug 2013
الإقامة: sudan
المشاركات: 60
هههههههههههههههه.. الصعاليق الفي الشارع ديل اقل هوما ياعم قوني ياخي
لينا بنت كامل غير متصل   رد مع اقتباس
قديم 11-19-2013, 10:00 PM   #4
القوني
عضو مُـميز جداً
 
تاريخ التسجيل: Feb 2010
المشاركات: 5,881
خلاص حأقول لينا الله يلعنكم.
التوقيع
للتاسع من يوليو القادم تبقتْ ألفا قصة فقط لك يا وطن
القوني غير متصل   رد مع اقتباس
قديم 11-20-2013, 02:22 AM   #5
لينا بنت كامل
عضو مشارك
 
تاريخ التسجيل: Aug 2013
الإقامة: sudan
المشاركات: 60
هههههههههههههههه والله حلولك دايما كسلانه ياخ.. مرة تمرد ناعم ومرة الله ينعلهم
لينا بنت كامل غير متصل   رد مع اقتباس
قديم 11-20-2013, 01:23 PM   #6
القوني
عضو مُـميز جداً
 
تاريخ التسجيل: Feb 2010
المشاركات: 5,881
خلاص بدل التعب دا أمشي البيت أنوم. هو أنا ناقصة مشاكل؟ فطور مافي، وفي الشارع مشاغلة. وفي المستشفي قلةأدب؟ دي حياة شنو دي؟؟؟؟؟
التوقيع
للتاسع من يوليو القادم تبقتْ ألفا قصة فقط لك يا وطن
القوني غير متصل   رد مع اقتباس
قديم 11-20-2013, 05:38 PM   #7
القوني
عضو مُـميز جداً
 
تاريخ التسجيل: Feb 2010
المشاركات: 5,881
(55)
عفواً يا لينا.. المكان هناك زحمة.
***
طبيبةٌ جميلةٌ مهذبة، مخطوبةٌ لعقدٍ كامل، خرجتْ من البيتِ في طريقها إلى المستشفى.
في الشارعِ لمْ تجدْ الفول للإفطار، في البوابةِ عاكسها الصعاليك، وفي الداخلِ استفزتها ممرضةٌ تعملُ قوادةً في المساء للحزب الحاكم.
فناولتها شجرةَ الياسمين الجافة غصناً وضربتها، في البوابةِ أفسحنا لها الطريق بأدبٍ جم، في الشارع أفطرتْ لحمة وكبدة، وفي البيتِ وقبلَ أنْ تشربَ الشاي بالنعناع سمعتْ الهتافَ يدوي: (يا الخرطوم جوطي جوطي)
وحين زارها خطيبها المفلس الذي يحبها بعد يومين...
ـ خطيبها الذي يحبها؟! من متى وأنا أكتبُ عن الحب والوطنُ يتفتّت؟ سأتلفها.
وحين زرتها في البيتِ بعدَ يومين، أخبرتني أنّ الرئيس زارهم في البيت، وطلبَ يدها لي، وأنَه أهدانا مزرعةً للفواكه في جبل مرة، ومزرعة للماشية في نمولي، وقصراً في أركويت، ومصنعاً في عطبرة، وأنّه سيحضرُ الزفافَ بنفسه ليرق.. لا، لا.. لن يفعلها.. سيأتي للتهنئة، وسيقولُ لكاتبِ هذه القصة: (أتعبت نفسك مع المواطنين يا شاب.. كلّ يومٍ تزوّج عشرة.. مبروك عليك هذه المرة)
التوقيع
للتاسع من يوليو القادم تبقتْ ألفا قصة فقط لك يا وطن
القوني غير متصل   رد مع اقتباس
قديم 11-22-2013, 12:06 AM   #8
لينا بنت كامل
عضو مشارك
 
تاريخ التسجيل: Aug 2013
الإقامة: sudan
المشاركات: 60
رائعه جدا.. لكنها فقاعه احلام وردية نتمني ان تتحقق .. وان تري نور الشمس بعد عتمة القمع..
لينا بنت كامل غير متصل   رد مع اقتباس
قديم 11-22-2013, 02:03 PM   #9
القوني
عضو مُـميز جداً
 
تاريخ التسجيل: Feb 2010
المشاركات: 5,881
وان تري نور الشمس بعد عتمة القمع..
الحمد لله أنك قلت الشمس.. فالشمس تشرق دائماً رضينا نحن أم رفض الانفصاليون.. سليني أنا. فأنا لنوي قادم من هناك، وقليلون نحن الذين نعرف الطريق إلى الشمس.. يا سلاااام. ليتك منهم!
التوقيع
للتاسع من يوليو القادم تبقتْ ألفا قصة فقط لك يا وطن
القوني غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 12:44 AM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker