Follow us Youtube Rss Twitter Facebook
قديم 07-21-2013, 01:08 PM   #1
Zahir Bakhiet
عضو جديد
 
تاريخ التسجيل: Jul 2013
المشاركات: 37
الزايط ما بنقدر... وحلم الهجرة (5)

الزايط ما بنقدر... وحلم الهجرة (5)
زاهر بخيت الفكى
غادر البلة والفضل الحلة لبدء إجراءات السفر للجماهيرية ..وقد ترك البلة فراغاً كبيراً لا يستطيع أحد أن يحل محله..
ركبا البص ..بى فوق ويأشروا للناس بالوداع والبص لازم يشق الحلال كلها فى طريقه للسوق..
ركبا وتركا عمك محجوب ينضم وهائج خصوصاً أن من بين المودعين جلال ود أخوه وهو من المواليين للنظام وما عاجبوا كلام عمو فى الحكومة ..لكن لا يستطيع الرد عليه قدام الناس..طبعاً عمو زول صعب ما بقدر عليه..رد على عمه وهو خائف من هيجان عمه ..لكن يا عمى الناس ديل عندهم حاجات سمحة وفيهم ناس كويسين شديد.. كويسين بتاع شنو.. بالله شوف الحاجات السمحة دى نحن جانا منها شنو البترول الفرحانيين بيه ده كان يصلحوا لينا بيهو المشروع الوقع ده..عاين ياعمى أسى ما عندك أنبوبة بوتجاز فى بيتك ..بلحيل عندى أخذتها بقروشى جابوها لى هم مجان..والبترول ده نحن ما عندنا فيه حق ..وشايفك كل ما تلقى ليك نفرين تلاتة نحنا ونحنا والظلط العملناه وين وين..شوف يا ود خوى لغاية هسى أنا ساكت ساى وبعاين فيك ..بتدافع عنهم ليه وعملوا ليك شنو أهلك لمن يصلوا السوق يصلوا مدفونيين بالتراب زى القايمين من المقابروإنت شغال الظلط..الظلط .
براحة كدة الجماعة قالوا لى جلال ياخ أمش عمك إنت عارفه براك مابسكت لى بكرة طالما بدأ ينضم فى الحكومة..والله أنا ذاتى ما عارفوا مالوا طوالى عندو رأى فى ناس الحكومة..رد عليه صديقه الكان معاه فى الجامعة واتخرج منها قبال ثلاثة سنين وما لاقى ليه شغل..جلال عليك الله بأمانة كده عملوا لينا شنو ناس الحكومة البتدافع عنهم ديل ..ناس أبوى ديل تعبوا علينا..قرينا الجامعة لا اشتغلنا عشان نساعدهم ولا فى أمل ..والحواشات بقت ما جايبة همها خليناها خايفين نزرع الموية تنقطع فى نص الموسم..والسنة الفاتت زرعت لى عجور نجح نجاح شديد مما بدأ يلقط شحنتوا فى اللورى جات مطرة بوظتوا وما قدرت أوديهوا السوق والفى الخلا ما نفع..ياخ خلينا أسى كان ما أخوانا الإغتربوا ديل ..كان إمور ناس بيوتنا جاطت..
الزايط ما بنقدر..الزايط ما بنقدر..الزايط ما بنقدر..
صا حبنا البلة لقى ليك الهواء بى فوق البص وهاك يا غنا ..وطبعاً مبسوط شديد أمه رضيانة منو والأهم من ذلك مبسوطة من المحبوبة التى لم يتحدث معها مطلقا..نزلوا فى السوق مشوا ضربوا ليك إتنين فول مصلحات ومعاهن قزازتين بارد والبلة قلبوا يدق من ناس الكشة ما يلاقوه ويخربوا ليه برنامج السفر..الفضل عنده بطاقة ورخصة سواقة ومشى الخرطوم كم مرة عنده ناس خالتوا بت خالة أموا بيمش يقعد معاهم..معروف عنه كذلك الطيبة الشديدة ومعاها هدوء شديد ورزانة..والبلة طيبة عجيبة لمن معاها رواشة ..
ركبوا البص الماشى الخرطوم..صاحبك البلة مشى إشترى ليهو جريدة لزوم الثقافة ..شافوا فضل لمن قعد يضحك عليهوا..كيف يا صاحبى وقت الله فكانا من شغل البوابير خلينا النتفلهم..بعد صلاة الظهر كانوا فى السوق الشعبى الخرطوم..مشوا الأكشاك شربوا ليهم كورتين ليمون وقعدوا يشربوا ليهم فى قهوة..إنت عارف يا البلة حقوا نمش لى قريبنا ده نبيت معاهوا عشان بكرة بدرى يبدا لينا إجراءتنا..عشان كلوا ما قعدنا فى الخرطوم بنصرف إخير نخلص سريع ..يازول البشوفوا أنا ما عندى رأى..وبعدين قريشاتنا ديل نفرقن ما نختهن فى مكان واحد يمكن ينشلونا..أحسن ..وكت الله مرقنا من الكشة يمرقنا من النشالين..أمدرمان..أمدرمان..نفر واحد أمدرمان..والبلة يدندن بصوت منخفض..الزايط ما بنقدر..الزايط ما بنقدر.. سنواصل
Zahir Bakhiet غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:43 AM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker