Follow us Youtube Rss Twitter Facebook
قديم 07-21-2013, 07:14 AM   #1
Zahir Bakhiet
عضو جديد
 
تاريخ التسجيل: Jul 2013
المشاركات: 37
الزايط مابنقدر...وحلم الهجرة (1)

الزايط ما بنقدر... وحلم الهجرة (1)
زاهر بخيت الفكى
وقف بلة فى أعلى الترعة يبحث عمن يساعده فى اصلاح التراكتور الذى يقوده وهو يدندن بأغنية الزايط ما بنقدر ..يتلفت يمين وشمال عله يجد من يعينه..
لمح زميله فضل من الناحية الأخرى للترعة
يا فضل ..يا فضـــــــــــــل ..يا فضـــــــــــــــــــل ....السلام عليكم
عليكم السلام .. بلة..مالك إنشاء الله مافى عوجة..
عندى مشكلة فى المحرات ده .. سامع لى فيه صوت كركبة..شكلو ما موزون كويس..أو يمكن كسر بلى
المهم تعال لى بى هنا وجيب معاك مفاتيحك والعفريته نحاول نوزن المحرات ونشوف لو فى مشكلة ثانية.
يحتاج فضل أن يمشى مسافة حتى أقرب كوبرى يعبر به ..ثم يعود من ناحية بلة
يازول ..من متين إنت هنا إنشاء الله تكون فطرت .. فطور شنو يا زول أنا شاى الصباح ما شربتو..الفطور هين ..أنا هنا فى حواشة عمك حاج شفقة ده جايبنى من الساعة واحدة ونص بالليل ..قال عشان المفتش الصباح لمن يجى يلقى حواشته جاهزة..وبى شفقتوا دى ما اشتغلت أى حاجة الدنيا ليل قاعد حارسنى لمن زهج فات قبل صلاة الصبح بى شوية.
أنا ذاتى كنت شغال سهرة عندى كسرة بايتة هاك أعجن فيها الطماطم دى فك بيها الريق..خلينى أحاول أشوف الحاصل فى محراتك ده شنو..بدأ فضل فى الفك والربط وصاحبنا بلة إنهمك فى الأكل وهو مستمتع ومتلذذ بالوجبة رغم بساطتها ولكن كما نقول فى عاميتنا ( الجوع كافر) حمل صحن الأكل ليغسله فى الترعة فى يد ويلحس فى أصابع يده اليمنى..وقد ارتفع صوته بالغناء بعد الشبع (الزايط ما بنقدر) ومعاها نطيط.
تجاوزت الساعة الواحدة ظهراً وأمامهم متسع من الوقت ..انهمكوا فى عملهم وهم يتجاذبون أطراف الحديث..
سمعت يا بلة صاحبك الهادى قالوا روق روقة شديدة فات اشتغل فى ليبيا جاب ليه خمسة وثلاثين مليون جنيه داير ليه بوكســى لــى( اخوه ) وشوية بقيرات لى( ابوه ).. وتحت تحت قالوا جايب ليه تراكتور ماسى فيرجسون جديد كرت كرتونة .. لينا بى حاله الله ريحوا من الشغلانة بتاعتنا دى شويتين حايجى يعرس ويخلينا نحن من حواشة لى حواشة..رأيك شنو أنا غايتو إلا ما ينتهى الموسم الفى قدامنا ده الشافنى فى ليبيا ما كضَب.
أقول ليك حاجة يا زول أنا معاك طوالى..خلينا نمشى نشوف الدنيا فيها شنو بس يا فضل أنا ما عندى جواز وجنسيتى ذاته مشرطة..ياخى لم قريشاتك العند الناس ديل أنا بسوقك لقريبنا شغال فى الجوازات أنا ذاتى ساعدنى فى الجنسية ..وعمل لى أبوى إجراءات الحج .
وبعدين قالوا ليك بالصحراء تركب بدون جواز تهريب ساى بعد إسبوعين تصل ليبيا ..يا زول هوى أنا لازم أطلع جوازى يمكن ربنا يهون لينا نمشى أوروبا موسم العنب قاليك إيطاليا وفرنسا تكلة من ليبيا ، شوف أخو سيف صاحبك من ليبيا قالوا مشى بلجيكا يشترى ليه شاحنة وبعدين بجى السودان .
أنا ذاتى كان ربنا ودانى سنة واحدة بمشى نيجيريا بجيب لى لورى نيسان أشحنه أسافر بيه الصعيد والغرب والعجب كان لقيت لى لورى هينو ( زد واى ) أمانة ما صاحبك يرطب ترطيبة.
بعد جهد تم الوصول الى المشكلة ..فعلاً يا بلة كلامك صاح البلى بتاعك ده مكسور أنا عندى واحد بشغلك بس داير ليه شحم ..لا ما مشكلة أنا عندى الشحم ..
تم تركيب البلى وتشحيمه ولم تكن لديه القدرة على مواصلة مشوار العمل ثم افترقا وهما يحلمان على أمل أن يجتمعا بعد نهاية الموسم لمغادرة السودان تسبقهم أحلامهم وأشواقهم وروايات من سبقوهم للهجرة .. وسنواصل معهم لنرى
Zahir Bakhiet غير متصل   رد مع اقتباس
قديم 07-28-2013, 01:04 AM   #2
اشرف السر
عضو مُـميز جداً
 
الصورة الرمزية اشرف السر
 
تاريخ التسجيل: May 2004
الإقامة: خارج الزمن
المشاركات: 5,829
بداية مشوقة...
وعمل يستنطق تفاصيل الحياة...

متابع يا زاهر
التوقيع
وتبقى النيلين هي الأصل
اشرف السر غير متصل   رد مع اقتباس
قديم 07-28-2013, 01:06 AM   #3
اشرف السر
عضو مُـميز جداً
 
الصورة الرمزية اشرف السر
 
تاريخ التسجيل: May 2004
الإقامة: خارج الزمن
المشاركات: 5,829
بس يا ريت (لحسن المتابعة) اذا عملت كل الاجزاء في بوست واحد
وكل جزء يكون في مداخلة منفصلة.. عشان الواحد يتابع بسهولة..

تحياتي
التوقيع
وتبقى النيلين هي الأصل
اشرف السر غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:49 PM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker