Follow us Youtube Rss Twitter Facebook
قديم 12-01-2013, 01:58 AM   #1
لينا بنت كامل
عضو مشارك
 
تاريخ التسجيل: Aug 2013
الإقامة: sudan
المشاركات: 60
يوميات شخوص عاديين.. الحلقة 7

يوميات صحفي..

إذن .. الشعب يريد إسقاط النظام...
محمد عبد الرحمن...
هكذا ختم مقاله الناري .. تحدث فيه عن كل شئ .. فساد الحاكم.. فساد الدوله.. فساد الشعب .. تحدث عن السودان القديم.. والجديد.. تحدث عن النهضة.. تحدث عن تبعات ثورة متآكله قد تحدث.. وتحدث عن معارضة منافقة.. وختم بأنه يريد إسقاط المعارضة.. قبل إسقاط الحكومه..

محمد..شاب غير موجود ألا في الكتب ..أو مخيلتنا عن الشاب المثالي..شاب يحترق وطنيه.. ينتشي بالأغاني الوطنيه.. ويبكي ألما.. وحرقة..كلما صاب الوطن جرح جديد..
وما أكثر الجراح التي ينزف منها وطنه..
يدعو دوما للتغيير.. يظن أننا غارقون في وحلنا ..لأننا لانستحق الخروج.. إختار هذه المهنه.. لشيئين.. ليسير علي خطي والده الراحل.. ولأنه يظنها مهنة الشرفاء.. يستطيع بها أن يصل إلي ما يريد ..ويخاطب بها من يريد..
...
هو ..يضرب يقبضته بكل قوة علي المكتب .. يشعر أن قلبه ..سيتوقف من الغضب..
: نعم؟؟ قلتا شنو يا أستاذ..
الأستاذ بنبرة هادئه..: قلتا ليك ..مقالك الأخير دا .. عايز تصحيح.. أرجعو ليك تصححو وللا أصححو ليك أنا؟
هو: بس أنا متأكد.. مقالي مافيهو آي أخطاء.. أنا حصل سلمتك مقال فيهو أخطاء؟
الأستاذ:أنا ما بتكلم عن الأخطاء الإملائيه.. ولا النحوية..المقال بتاعك لهجتو مستفزة.. فيهو حاجات ماليها داعي .. يعني مثلا.. العنوان.. من فساد الحاكميه.. غيرو.. بقيهو أي شي تاني..حأديك مساحة إبداع وماحقول ليك تغيرو لي شنو..
الإفتتاحية بتاعت المقال .. غيرها.. بتديك إحساس التحريض لي ثورة.. غير كلمة مات ضمير الحاكم دي ماف داعي ليها.. وكمان.. يموت الناس في كل مكان بالجوع.. دي مبالغه شوية..ماف زول قعد يموت بالجوع ..إلا في الصومال..وكمان.. كلمة المؤسسات الحكومة تعج بالسرقة..وتغرق في الفساد.. دي قوية حبتين..ماف داعي ليها..وكمان ختام المقال..لنسقط النظام.. علينا بإسقاط المعارضة أولا.. إذن نحن نريد إسقاط النظام..دي كمان مافي داعي ليها..يدفع بالمقال إليه.. قائلا..: شيلو صححو..
هو : إذن المقال كلو مافي داعي ليهو يا أستاذ..إنت ما خليت جملة في المقال ماغيرتها.. أنا كتبتا المقال كدا.. وحيتنشر كدا.. أو ما يتنشر..
هو يتنهد: كلنا جينا متحمسين زيك كدا.. وكلنا كنا عايزين نغير.. عايزين البلد تتصلح.. بس البلد ما أدتنا فرصة نصلحا .. لأنو البيكون عايز يصلح في البلد دي بيتحارب من كل الجهات لكن في النهاية.. حتفهم..وتبقي زينا تماما..
هو: البلد ماقعد تتصلح عشان إنتو إستسلمتو.. عشان إنتو كمان بتحاربو الشباب المتحمس.. في النهاية.. يا بتطردوهو.. يا بتحولوهو يبقا نسخة منكم..منافق.. كذاب.. وبيعمل أي شي عشان يرضي كل الناس.. وبينسي يرضي ضميرو ونفسو..
هو غاضب: ماتتجاوز حدودك.. أعرف حجمك .. وأعرف إنت بتكلم منو..أنا ما حعرض جريدتي التعبتا عشان أأسسا.. عشان طفل متحمس.. فاهم إنو حيغير العالم.. بي قلم.. يا إما تغير المقال أو إنت مطرود..
هو: أنا ما مطرود.. أنا بستقيل.. ما يشرفني أشتغل في جريدة .. صاحبا ما بيؤمن بقوة القلم.. صاحبا ماعارف إنو العالم إتغير بكلمة.. حاليا.. إنت مامحتاج جريدة عشان الناس تسمعك ..محتاج بس قلم..وأنا ما حستغني عن قلمي ..ولا ضميري ..ومتأكد .. إنو حيجي يوم والناس تسمعني فيهو..
هو يضحك.. : شعارات.. صدقني .. كلنا مرينا بالمريت بيهو دا..مجرد حماس.. ولما تكتشف إنك ماحتغير حاجه.. وتجوع ..لأنو ماف زول حيشغلك..حتجي راجع هنا.. وساعتها .. كل الحيكون في يدي أخليك تتعقب أخبار الفنانات..
هو : حأواصل.. لغايت ما أموت بالجوع.. وإنت.. خليك متابع.. يمكن تجي فنانه صوتا كويس..تستاهل تجي في جريدتك..
ويخرج ...أكثر حماسا.. أكثر إصرارا.. أكثر تصميما..
في الفترة التي تلت إستقالته.. غزت مواقع التواصل الإجتماعي ..مجموعة مقالات يوميه.. لاذعة.. تنتقد كل ماتراه.. تدافع عن المظلومين.. وتقف مع الحق ..والحق فقط.. موقعه أدناه.. ب..مجرد طفل متحمس ..

هل من الممكن لقلم.. أن يجلب معه طوفان التغيير؟؟هل الأقلام تمتلك هذا التأثير في حياتنا

التعديل الأخير تم بواسطة لينا بنت كامل ; 12-07-2013 الساعة 01:40 AM
لينا بنت كامل غير متصل   رد مع اقتباس
قديم 12-02-2013, 06:35 PM   #2
القوني
عضو مُـميز جداً
 
تاريخ التسجيل: Feb 2010
المشاركات: 5,881
هذه القصة مفبركة. وإلا فأين علامة الاستفهام في نهاية القصة يا عصفورة؟
التوقيع
للتاسع من يوليو القادم تبقتْ ألفا قصة فقط لك يا وطن
القوني غير متصل   رد مع اقتباس
قديم 12-04-2013, 01:39 AM   #3
لينا بنت كامل
عضو مشارك
 
تاريخ التسجيل: Aug 2013
الإقامة: sudan
المشاركات: 60
اقتباس:
المشاركة الأصلية كتبت بواسطة القوني مشاهدة المشاركة
هذه القصة مفبركة. وإلا فأين علامة الاستفهام في نهاية القصة يا عصفورة؟
علامة الاستفهام .. اتنست مع حاجات كثيرة..
لينا بنت كامل غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:57 AM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker