Follow us Youtube Rss Twitter Facebook
قديم 07-21-2013, 07:20 AM   #1
Zahir Bakhiet
عضو جديد
 
تاريخ التسجيل: Jul 2013
المشاركات: 37
الزايط ما بنقدر... وحلم الهجرة (3)

الزايط ما بنقدر... وحلم الهجرة (3)
زاهر بخيت الفكى


شوفو الزول البصفق برة ده منو..
ده حاج سليمان سيد البابور السايقو بلة..إزيك ياحاج عليكم السلام سليمان خش لى جوه ..والله ياحاج مستعجل لكن جيتك أشوف الحكاية شنو.. جانى بلة ساق البابور قال عندك فول فى الخلا ماشى يجيبو وبكرة ماشى الخرطوم يطلع جوازو..والله فتح رأسى على نصيين.
كدى أقعد أشرب ليك كباية شاى..شاى شنو يا زول أسى ختيت الكباية وجيتك خشمى لسه حار..وكان لى البلة أنا بديهوا الدايرو خليهوا يقعد مالوا ومال الغربة وربنا يديهوا العافية والله ما قدامك الزول الوحيد الريحنى وزيو ما بتلقى ..وكان داير يزرع بديهوا فدانيين إزرعهم بصل ..بشوفوا ليك يا حاج سليمان لكن الله أعلم البلة ولدى مع طيبتوا دى لكن الفى راسو فى راسو.
مع المغيرب كده جاء البلة شايل فول أبوه فى الترلة راكبين معاه أولاد الحلة مع صوت بابوره المميز (رابط ليهو كوز) ..غشى أحمد سيد الدكان باع ليه خمسة شوالات فول ختاهن فى جيبوا واشترى ليهوا نص رطل بن وجنزبيل لى أمه ..مشوا نزلوا الفول فى حوش الديوان ..وفات رجع البابور لى حاج سليمان ..ما لاقاه خت ليهوا مفتاح البابور فى البيت ..وطوالى مشى لى ناس فضل يتفاكر معاه فى سفر بكرة وبالمرة كده يديها نظرة وداع للحبيبة عشان كده قال لى أولاد الحلة الكانوا معاهو انتظرونى قدام دكان أحمد ده انا بجييكم بعد شوية..
قبل أن يصل بيت ناس فضل غير رأيو..رجع بيتهم إستحمى ولبس ليهوا جلابية نضيفة وعندو ريحة تركيبة عاجباهو إتريح منها وشنق طاقيتو ..قبال ما يمش ناس فضل سأل أخته كويتى الهدوم ولا لسة ..أختو قالت ليه لسه ياخوى بنكويهن بعد شوية أنا وفاطنة ..فاطنة منو سألها بلة وهو يعلم انها الحبيبة .وهو لايعلم إنه أختو ناقشة موضوعوا..أخت فضل عشان دايرين نخت ليكم هدومكم فى شنطة واحدة ..خلاص هاك أمشى جيبى ليك كيسين شعيرية وربع كيلو طحنية..كاد يطير فرحاً يمكن يلقى ليه فرصة يطق معاها الحنك مع أنه زول خجول وكبكابة ..
رجع لى أولاد الحلة فى الدكان لقاهم شايلين ليهم دقيق وزيت قالوا دايرين يودوهوا يعملوا ليهم لقيمات وشاى نظام قعده للفضل وبلة..خربوا ليه برنامجوا عشان ما حيلقى ليهوا فرصة يتكلم مع فاطنة..إتلملموا الجماعة فى ديوان طرف الحلة جابوا ليهم مسجل وشرايط وجابوا معاهم جلبقة عشان يغنى ليهم ..حتى رجال الحلة الكبار جو قعدوا معاهم والشفع الصغار ونسوان يتاوقن بى فوق حيطة الديوان ..الفضل وبلة غالباهم القعدة فى الواطة وبعد شوية جات اللقيمات ومعاها كفاتير الشاى والكبابى يكركبن فى الصوانى والشريط شغال دلوكة شديدة ..الناس مهيصة والبلة قلبوا هناك يفكر فى فاطنة القاعدة مع أخته وما لاقى ليه فرصة يزوغ يشوف الحاصل..قام واحد مفتح من أولاد الحلة بقرأ فى الجامعة ..يا جماعة أسكتوا شوية ووقفوا الشريط ده عندنا كلمة ..تكلم صاحبنا عن الفضل وبلة كلام كتيير ثم دعا لهم ربنا يوفقهم ووعد الناس بى قعدة كبيرة يوم يجو مسافرين ليبيا..كدى أسى يا جلبقة سمعنا حاجة كاربة كده خلينا نطرب شوية ..قبل أن يبدأ جلبقة بالغناء جاءه البلة منادياً وسط ضجة الحضور جلبقة ..جلبقة.. نعم البلة عليك الله غنى لى الزايط مابنقدر ..
وسنواصل
Zahir Bakhiet غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:07 AM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker