Follow us Youtube Rss Twitter Facebook
قديم 07-21-2013, 07:17 AM   #1
Zahir Bakhiet
عضو جديد
 
تاريخ التسجيل: Jul 2013
المشاركات: 37
الزايط ما بنقدر... وحلم الهجرة (2)

الزايط ما بنقدر... وحلم الهجرة (2)
زاهر بخيت الفكى

البلة وصاحبوا فضل بعد أن أصلحا البابور ..ذهبا للحلة يصحبهم الحلم والأمل فى السفر للجماهيرية...وما بعده من حصاد الغربة..
مالك ياولدى إتاخرت ..شغل التركرك ده يوماً أسود رماك فيه..شغلت قلبى عليك من أمس ما شفتك ..حميتنى النوم الليل كلو أتاوق ليك ..كل ما اسمع لى حركة ..
والله يا يمة أنا كنت جاى من الصباح لكن لقيت بلة فى الخلا بابوره خسران صلحناه وجينا ..وبعدين يا يمة ما شغل البوابير كلوا بالليل..يا ولدى قلب الوالد تليفة..
وصاحبك ود السعدية ..سجم امو.. يوم بلقوه واقع ليه فى ترعة
خلاص يمة قربت تفرج ..نحن ماشين ليبيا أنا وبلة بعد الحصاد ..
ماشين تسوو شنو كان إنت كان صاحبك قراية ما قريتو مرقتو خليتوها.. وهناك لا فى تركركات ولا حواشات
منو القاليك يمة مافى ..هناك فى مصنع بوابير (تراكتورات) عديييل..وعندهم زراعة صاح مازى حقتنا دى.
إخير ليكم يا وليداتى تقعدوا فى بلدكم تسوقوا تركركاتكم لغاية ما ربنا يديكم بنات الحلال يمسكنكم ويعدلن حالكم المبشتن ده..وكان لى ودالسعدية نهاروا كلوا يلهله برا شغلة فى الزايط الما بنقدر.
يمة أدينا خاترك..بكرة بعد ما نرسل ليكم إنتى وخالتى السعدية قروش الحج بتقولوا وحاتنا وبتحلفوا بينا.
إنشاء الله يا ولدى ربنا يوفقكم ويديكم الفى مرادكم ويهون قواسيكم
كانت فاطمة شقيقة فضل تتابع النقاش وهى سعيدة بأخبار سفر أخوها و البلة وهى تحس بإعجاب بلة لها من بعيد لى بعيد ..
سرعان ما شاع الخبر فى الحلة مع دعوات نساء وشباب الحلة لهم بالتوفيق خصوصاً البلة ..شاب يتمتع بأخلاق عالية وطيبة وعفوية جعلت منه فاكهة الحلة والحلال المجاورة ..و معروف عندهم بترديده لمقطع أغنية الزايط ما بنقدر وقد سموه ( الزايط ) وقد زاد ترديده لها وبصوت عالى مع حلمه بالسفر.
لم يرتاح حاج سليمان صاحب التراكتور الذى يقوده البلة لفكرة سفره وقد عمل معه لمواسم عديدة وقد وصفه بالأمانة الشديدة ..
لم تمر شهور قليلة وقد شارف الموسم على النهاية واجتهد بلة وفضل فى الجرى وراء ديونهم عند المزارعين كعادتهم عند نهاية كل موسم ، وهذا الموسم مختلف بالنسبة لهم .
إنتى عارفة يا حاجة السعدية أول مرة أشوف البلة ولدى ده مبسوط كدة عاجباهو المرقة من البلد..بس بلة ولدى طيب وخائف عليه من الغربة وعمروا ما فارقنا والغربة صعبة شديد ما بقدر عليها .
والله يالحاج أنا عافية ورضيانة منو إنشاء الله ربنا يديهو لمن يرضيهو.. وخايفة عليه من مصائب الزمان .. لكن عارف البلة براك رأسو قوى والدايرو بعملوا..يمكن الغربة تنفعوا ..
الزايط ما بنقدر ..الزايط ما بنقدر ..الزايط ما بنقدر
أها جاك الزايط ..عاد اليومين دى فرحان جنس فرح , إن قلت ليهوا زح من الدرب يقول أنا ماشى ليبيا..
يمه يمه .. حبابك البلة
أبوى وين..يا هو ده أبوك داير بيه شنو
فى زول راجيه بره ..منو يا البلة .. ده الزول الشغال ليه فى دق الفول..قاعد فى الديوان ..كلمى أبوى خلينى أشيل للزول ده مويه..
يا بلة... مرحب يا أبوى إنت كويس..
الحمد لله بس دايرك تسوق الترلة تجيب الفول الدقوه ده من الخلا عشان ما ينسرق..كويس أبوى خلينى أمش أجيب البابور من حاج سليمان عشان أنا الليلة سلمتو بابوره وحاسبتوا وبكرة الدغش إنشاء الله أنا ماشى الخرطوم مع فضل عشان أطلع الجواز.
الله يوفقكم يا ولدى..لكن أمش الليلة جيب الفول وشيل ليك منو خمسة شوالات بيعهم بنفعنك فى التجهيز ..والخرطوم دايرة قروش كتيرة..إنشاء الله يا بوى...وسنواصل
Zahir Bakhiet غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 02:25 PM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker