Follow us Youtube Rss Twitter Facebook
قديم 09-19-2011, 12:44 PM   #1
رومانسِ العطر فرنس
عضو فعال
 
تاريخ التسجيل: Feb 2010
المشاركات: 566
تجربتي مع السجن




دائما السجون في مخيلة الواحد بتخيل السجون الامريكية والافلام بما فيها من ظلم وقهر والضعيف مأكول وعصابات وعتاة المجرمين والمتفلتين من القانون والحقارة والاغتصاب والذلة وغسيل الهدوم للاقوى منك وتنظيف الحمامات والغرف .
ولاياتي طاري السجن وإلا عقلي اذهب الى هذا المنظر وبحس انو الناس الداخله السجون داخله تحت الارض ودا عالم تاني مجهول ومافيهو شيء يبشر بخير

جات الحافلة الساعة عشرة بي الليل وركبونا من قسم التحقيق مع اربعة انفار موديننا للسجن وكانت مشكلتي انو شاكت واحد من العرب ديل والكويسة انو ما مديت ايدي عليهو المهم ركبنا الحافلة حافلة هايس وتعال شوف الناس دي بسوق كيف الحافلة دي بخبتوها خبت الابنس دا على الاخر على طول من أول تعشيقة الى اخر تعشيقة نمره خمسة الابنس ما بزح من الحديدة القدام

ذكرني سواقت بكاسي اللبن مشي هو عينك ما تشوف الا العجاج والكتاحة لا يخلوا سرابه لا يخلو حفره . ونحنا في الحافلة من كوع الحافلة الاول لي كوع الحافلة التاني مرات راسنا يدق فوق في السقف ، ماسك بي ايدي واسناني وقلته والله اليابانيين ديل صنعوا عربات ميه ميه مافي عربية بتستحمل المشى دا الا يابانية وقلته ياربي الحافلة دي بتعدي معاهم السنة دي في المشي والجية - التعاشيق لمن تسمع سوت الحديد اطقطق حتين ابدلوا التعشيقة مرات تسمع صوت الكربريتر دا كانوا جنبك قلته ياربي بمشوا كده خايفننا ننط من الحافلة دي السرعة 160 في شارع ماتقدر تمشي فيهو بي 100 وله نحنا بلوى حابين انتهوا منها بي أي طريقة .
ياخي السواقة دي طيرت رحمان قلبنا بالله السجن الماشي ليهو بقيت في كيفن اصل واصابعي كلهن مكنكشات في الشبشب متوقع أي لفة بي السرعة دي
المطبات بنجي فيهن كانوا مافي مطب لمن تسمع صوت العفريتة وراء بتضرب في الحديد الخلفي انا قلته اكيد المطب دا دخلنا بي سرعة 30
وصلنا ماعدينا لينا 12 دقيقة في مشوار اظنوا ساعة
دخلنا غرفة الإيداعات كتبوا اسمي وعندي مبلغ من المال ختيتوا عندهم وتلفوني قفلوهوا وبيني وبينكم قنعته منهن ودخلته السجن
سور عالي خلاص ومشبك بي سلك شايقي وكم باب عديناهو والباب فيهو كم ترباس والترباس قدر شنو تسمع صوت الترابيس وهي بتفتح وتقفل زي الخاشي ليك حمام رهبه واحساس المطبول لا حوله ولا قوة الا بالله الحرية دي زيها مافي والله الناس ما عارفة الحرية الا البفقده
التوقيع

كــل ذكرى الناس تــروح
إلا ذكرى الروح من روح
لروح
رومانسِ العطر فرنس غير متصل   رد مع اقتباس
قديم 09-19-2011, 12:47 PM   #2
رومانسِ العطر فرنس
عضو فعال
 
تاريخ التسجيل: Feb 2010
المشاركات: 566
دخلتة السجن وقالوا لي دا عنبرك عنبر طويل زي اسطبل الحصين واول ما دخلته الباب جنب الباب طوالي وجدت مكتوب على الحيطة الجنبها السرير الســــــــــــــــفـــــــــاح بي خط اسود عريض وكبير كل الافكار السوداء ديك جات في راسي من كلمة السفاح مشيت لحدي مالقيت مكان فاضي وجلست ، الواطة كانت بي الليل زي تسعة كده وقلت لي الجماعة دا مكان فاضي قالوا ايوا
لفت انتباهي انو الجماعة ديل قاعدين في مساطب اسمنتي عاملنها سراير واي واحد خاتي لحاف وبطانية فوق اللحاف وراقد ومتغطي بي بطانية ومكيف تكييف مركزي
واكت خايف من المكيف لاني مجرب المكيفات في الطائرة والبصات السياحية بتتعب كرعي قلته ياخي انا داخل عالم تاني المكيف دا الز شيء فيهو .
عندي حبوب ومواعيد لي حبوب قلته الداخل السجن دا اموروا كلها يتتلخبط قال حبوب قال ومواعيد خلاص اندكيت دكاً دكا واتذكرت السجن للرجاله

ياخي اول مره احس باني مقيد والحيطان ماسكاني وانا زول خلا ، زول بر اعشق اشوف الرهاب وزول بحر اعشق اسبح وما في أي حاجز اقيف في وشي نتخطى الموج زي حيطان السجن وفجاء اجي الاقي نفسي مكتف تكتيف داخلي ومحبوس زي الطير في القفص واتذكرته قصيدة قد كان عندي طائر في قفص من خشب لمن جيت في بيت ففر عندي ومضى وقال لي حرية لا تشترى بالذهب عرفته قيمة الحرية هنا .
وتكتيف خارجي متربس وقاعد جاتني فكرة الواحد لو فكر يهرب بطلقوا عليهو طلقه - والعنبر دا بقى لي ضيق وبقيت اتنفس بي ضلوعي .
بعد شويه قالوا العشاء جاء ما قمته للعشاء ولا عندي نفس للعشاء الجماعة جوني ليك المساجين مالك ومشكلتك شنو اتذكرته الافلام المصرية ديك الواحد اجي ياخد منك اقوالك وعلى طول اسجل اعترافك لي الشرطة يكون مدسوس وجاسوس وادبسك اصلوا ماقلته حاجه بتوقعني

بعد شويه جاء واحد ولحيتو لي صرتوا فجاء العنبر كلوا سكت
التوقيع

كــل ذكرى الناس تــروح
إلا ذكرى الروح من روح
لروح
رومانسِ العطر فرنس غير متصل   رد مع اقتباس
قديم 10-13-2011, 12:41 PM   #3
رومانسِ العطر فرنس
عضو فعال
 
تاريخ التسجيل: Feb 2010
المشاركات: 566
ومشي لي لحافوا المكتوب عليهو السفاح بعد شوية تاني الجماعة بدوا اتكلموا تحت تحت كده انا عرفته انو الشخص دا بتاع مشاكل وهارش الجماعة باقي الريس هنا جاء سالني ليك كم سؤال ومشكلتك شنو حكيت ليهو الحكاية باختصار
وقال لي : مقدم الشكوى عليك شنو ؟
قلت ليهو المقدم الشكواى ابوه . انو انا بعاين في بيتم وانا هددتوا بي القتل . طبعاً الولد كلم ابوهوا وحمضوا الموضوع وطبخوهوا على اساس افنشوني .
قال لي : وانت هددتوا بي القتل
قلت ليهو قتل شنو : اعوذ بالله .
بعد شوية نفس الشخص قال لي لو هددتوا بدوك سته شهور سجن لاحوله انا يوم واحد طفشني ليك كمان ستة شهور.
المهم رقده اليوم داك والكويسة اتعودته ارقد على صفحتي اليمين السجون دي كلوا كلوا ما ترقد فيها على بطنك ! من صفحة لي صفحة لمن الواطة صبحت وفي الصباح نفس الشخص الهارش الجماعة مع الاذان الاول لمه في الناس ضرب المساجين معظمهم من الجنسيات الهندية التامليلية والبنغالية السورية - الشارد من كفيلوا والشغال بره والقاوم الشرطة يعني احكام خفيفة
سالتهم وين الاحكام الثانية القتل والاعتداء قالوا دا سجن براهوا السجن الثاني حمدته ربي انا هنا

الشخص لمن جاء عليّ اتورني ضربني ضرب زول جديد وما عارف حالتو بي هدوا كده قال لي قوم صلاة الصبح قلت له يادوب دا الاذان الاول الواطة لي هسي والاذان التاني باقي ليهو نص ساعة واحد هندي مغلوب على امروا بعد ما وهط كرعيهو وخلى الشخص فات قال الاذان باقي ليهو نص ساعة بي زهجة كده ورجع نام تاني لكن لو جاء الشخص توروا تاني بقوم نظام طنطنه ومص ملح .

انا قلته انا لو قعدته في السجن دا ياني الضارب الشخص دا








التوقيع

كــل ذكرى الناس تــروح
إلا ذكرى الروح من روح
لروح
رومانسِ العطر فرنس غير متصل   رد مع اقتباس
قديم 10-13-2011, 12:43 PM   #4
رومانسِ العطر فرنس
عضو فعال
 
تاريخ التسجيل: Feb 2010
المشاركات: 566


المهم مشيت صليت الصبح اشوف ليك الناس دي سوووود وجسمهم اسووود قلته في نفسي دا الضل بكتل الخلايا والله زي الشمس دي مافي ياخي الحرية دي نعمة والشمس دي الناس ماعارفه قيمته الشمس دي نعمة كبيرة خلاص ، بالله احر حاجة تبقى الزا حاجه السجن دا ياما بوريك النعم صاح وقلته ياربي مابدوهم ساعة اتشمسوا فيها

ماشاء الله في المسجد الناس ماسكه المصحف وتقرأ في الحفظ وفي المداوم مشيت العنبر تميت باقي رقدتي لحدي الساعة 7.30 قالوا الفطور مشيت شلته صحن رز مع دمعة بالله ماقدرته آكله اكل سجون فعلاً أي كلام مسيخ المهم قلته اصبر بيهو لحدي الغدا جاني سوري اتونس وقلته ليهو انت مشكلتك شنو ؟
قال لي : صاحب البيت قال لينا اطلعوا من البيت ونحنا دافعين اجار واشتكي في المحكمة ونحنا رفضنا نطلع جات الشرطة والمهم شردته ولحقوني ناس الشرطة وقاومتهم امسك فك قالوا في المحكمة انت قاومت الشرطة .
وكذلك العنبر فيهو كم هندي وبنغالي سالوني ليك وعرفته مشاكلهم وعرفته لي الجماعة بختوا بطانية في المسطبة البرقدوا فيها انا ختيت لحاف بس بالله الرطوبة الفي الاسمنتي كلها دخلت رجوليَ .
طوالي مشيت جبت لي بطانية وفرشتها فوق اللحاف وتميت باقي رقدتي لحدي الساعة 11.30 اذن الظهر مشيت اتوضيت ودخلته المسجد صليت الظهر بعد شويه جابوا الغداء رز مع سمك وله دمعه اخترته الدمعة لاني بعرف السمك المطبوخ أي كلام اخير عدموا

احلى مافي الموضوع التحلية كستر بالله ذكرني كستر السودان موية سوداء سخنة واضافوا عليها الكستر والسكر الكستر القديم داك وانا بعشق الحاجات القديمة كباية شاي بي لبن مع عيشه كستر رز بي لبن رقاق بي لبن اتذكرته السحور في رمضان .

بعد شويه مشيت المسجد قعدت شوية وقريت وادعيت ربنا يفرج كربتنا ورجعت العنبر بعد ساعة لقيت الجماعة هنود مدورنها كتشينه ماعندي أي نفس لاي حاجه مشيت على سريري واتخمدته نفسانياتي في الارض وبالى كلوا وتفكيري في النت وموقعنا حق القرية والرد علي المشاركات الكتبتها منو وقلته السجن دا عمل للينا شخيت وياريت لو في السجون انترنت اكان الجماعة ديل رطبوا تاني فكرته كده قلته لو في نت بخشوا المواقع التانية ودي كمان مشكلة في السجن احسن كده

بعد سبعة دقايق كده اشوف ليك الجماعة سكتوا سكته وبدأ أي واحد انسحب الجماعة القادعدين كلهم فرتقوا والمكان بقى فاضي شفته الشخص جاء داخل العنبر الجماعة كلهم طفشوا طفأء النور ورقدنا مافي أي واحد فتح خشموا انا قلته دا برنامج الجماعة ديل مافيهو أي تفاهم غيلوله ---غيلوله ----
حكم التكوا
التوقيع

كــل ذكرى الناس تــروح
إلا ذكرى الروح من روح
لروح
رومانسِ العطر فرنس غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 01:16 AM.


Powered by vBulletin® Version 3.8.7
Copyright ©2000 - 2021, vBulletin Solutions, Inc. Trans by
Protected by CBACK.de CrackerTracker