Follow us Youtube Rss Twitter Facebook
قديم 08-22-2005, 11:12 PM   #1
متشرد
عضو مُـميز
 
تاريخ التسجيل: Mar 2004
المشاركات: 4,024
ظرفاء عصرهم

كل زول بعرف واحد من الظرفاء على الأقل! أتحفونا بيهم
الزول ده زول عجيب جدا ما شغال بأي حاجة وما عندو هم بتاتا ألبتة (حلوة ألبتة دي صاح؟) والنكتة عندو زي أكل الموزة ما دايرة تعب وتفكير وحاجات تانية حامياني والمشكلة إنو ما مسئول أبدا وحل المشكلة إنو ما بهمو رأي زول فيه وزي ما قال الكتيابي: على كيفي أرقع جبتي أو لا أرقعها على كيفي (ده البيت الوحيد الفاضل في الذاكرة الخربانة دي فما تلومونا)، ورغم إنو ما بهمو رأي الناس إلا إنو يحب الناس جدا وما يقدر يقعد براه نهائي (نهائي دي أخت "جت" ) وكنت لما أسافر البلد أمشي أصلي المغرب والعشاء في الخلوة والخلوة دي جنبها دكان وبالتأكيد في عنقريب ( أوع تكون كلمة عنقريب دي محتاجة تفسيرتكون عوجة وعوجات) وكان صاحبنا ده يجي يقعد في العنقريب ده منتظر نهاية الصلاة (الصلاة دي بتلم ليه الناس) وبمجرد نهاية الصلاة يجي متلّب في البرش (لو في كلمات غير مفهومة ممكن نعمل ليها حاشية بعدين) أها وهاك يا ونسة وقرقراب وبمجرد ما تجي صلاة العشاء ويقوم الشخص المؤذن يشوف ليه مكان عالي للأذان صاحبنا يرجع عنقريبو يصنقر لحدي ما الصلاة تنتهي ، أها يوم قال للجماعة: أكان سويتو لي حاجة أأذن ليكم بدل الزول الصوتو إتقرش ده!!! أها الجماعة لقوها فرصة قالوا ليه: كويس جدا لكن المؤذن لازم يقيم الصلاة. وصاحبنا رد بسرعة مهولة: أفو بقيما إن وقفتوني في الطرف.ومرة الزول ده كان شغال في بناء سور بتاع مدرسة جنب المقابر (المقابر دي ماشة مشي جد حتى البيوت الجنبها في ضيق) المهم مر عليهو نفرين أبوهم مدفون قريب جدا من المدرسة دي وأبوهم ده أظن مات وعندو مية سنة وزيادة فقاموا قالوا ليه : هوي يا زول أعمل حسابك على أبونا ده راقد جنبك. قاليهم: هو أبوكم فايق لي؟ تلقوا الملائكة بتزرزر فيه في تأخيرو ده.
ومرة من المرارير (بس لقيتها ما ظريفة كل مرة أقول مرة) كان الجماعة يلعبوا الكوتشينة على ضوء الرتينة (شوفوا إسمها لما يتكتب بكون غريب كيف) المهم أثناء اللعب إتحرقت الشاشة فولع واحد منهم بطاريته والناس شبكوه ليك: نور الله قبرك. فرد صاحبنا عليهم : لي شنو، داير يذاكر؟ ( شوفوا المساخة دي كيف).
التوقيع

التعديل الأخير تم بواسطة متشرد ; 11-25-2005 الساعة 08:55 PM
متشرد غير متصل   رد مع اقتباس
قديم 08-22-2005, 11:15 PM   #2
متشرد
عضو مُـميز
 
تاريخ التسجيل: Mar 2004
المشاركات: 4,024
غايتو الزول ده لذيذ لذاذة شديدة (لذاذة دي مفعول مطلق عشان ما في واحد يقول لي جايبها من وين)
والعجيبة لما يسكر والعجيبة الأعجب كمان لما يكون في حفلة ويطرب ويقوم يرقص الرقيص الأنيق داك البخلي الناس يفضوا ليه المكان والعمة تقول هرم خوفو، غايتو حاليا فات مرحلة الشباب ولسه عايش المرحلة تمام!!!
مرة طلع مع واحد من البشاريين يشربوا العرقي أعاذنا الله وإياكم وطبعا المشوار بعيد ( الزمن ده أظن الآية إنقلبت بقى محل الحاجات دي أقرب ما يكون ) فركبوا ليهم جمل وبعد شربوا شالوا معاهم وجو سادرين (دايرة المعجم الفريد سادرين دي) المهم لمت ليك فيهم الشرطة ها ها ها زولنا إنزلق من الجمل (الظاهر ما ماسك في رفيقو كويس) والبشاري نهر الجمل بتاعو وطار طيران وطبعا الممحوق ده إتقبض، ولما وصل قدام القاضي سألو: إنت وكت بتعمل الحاجات العيب دي مالك ما بتمشي بي فوق. قال للقاضي: يا مولانا فوقا مالا الجمل؟إذا ما إتفهمت نحاول نترجمها بالفصحى المرة الجاية فإذا في أي ملاحظات أدونا ليها وما تبخلو.
غايتو الزول ده الله يديهو العافية ويتوب عليه وعلينا كلنا ظريف جدا بس المشكلة غربة الجن دي خلت الذاكرة زي المخلل (ليه زي المخلل بالذات ما تسألوني لأني ذاتي ما عارف).
نديكم واحدة من عمه المرحوم وهو رجل من ظرفاء البلد والجماعة سألوه عن حالو مع الدنيا فقال: أي واحد بقول هافي علي طرف خيطي وأنا الخيط ذاتو ما عندي. (هافي معناها ضايع وعندنا صديق متضايق من الغربة دي إلا الرجول متوحلة طوالي بقول: كيف الواحد لو قام هفا ، ويعني يضيع على الآخرين في مكان لا يستطيع أن يتصل به أحد أو يعرفه أحد فيكون بالنسبة للآخرين هافيا أو ضائعا، وصدقوني في كلمات في الدارجي ده لما تتكتب بيكون شكلها غريب جدا لدرجة إنك تتوهم إنك أخطأت في الإملاء بتاعتها، والحاجات الزي دي خلتني أفهم بعض الشئ ليه الناس التانين ما بقدروا يفهموا كلامنا بالسرعة المطلوبة.
التوقيع

التعديل الأخير تم بواسطة متشرد ; 11-25-2005 الساعة 09:05 PM
متشرد غير متصل   رد مع اقتباس
قديم 08-23-2005, 09:42 AM   #3
تاجو
عضو فعال
 
تاريخ التسجيل: Jul 2005
المشاركات: 368
الأخ المتشرد .. موضوعك غاية في الظرافة .. صراحة لا أعرف أحدا من الظرفاء لكن عندي مواقف ظريفة .. سأرويها .. زمان أيام الطفولة سافرنا السودان .. و نزلنا في البلد .. عمي كان عندو حمارة بيضاء غاية في الجمال .. وطبعا أنا أول مرة أشوف حمارة .. عمي رابطها جوة البيت جنب شجرة نيم .. مشيت عليها و ملست راسها و لاحظت انو عيونها غاية في السواد .. فسألت عمي مين الكحل الحمارة بتاعتك .. و طبعا حتى هذا اليوم هم يضحكوا على هذا الموقف .. موقف آخر .. عندنا و لد عمي التاني ... بحب بنت عمي التالت .. المهم الزول ده قرر يكلم بنت عمو انو عايزها و عايز يتقدم ليها (( الموقف ده شوف عين )) .. و الوقت المناسب بالنسبة له كان وقت بنت عمنا شايلة الجردل بتاع الموية و بتملاء في الزير .. وقف قدامها زي الأسد و قاعد يجمع في الكلام و قال ليها تهااااني أناعايز .. أنا عايز .. أنا عايز .. أنا عايز يد الجردل .. لكم التحايا و دمتم.
التوقيع
تاجو غير متصل   رد مع اقتباس
قديم 08-23-2005, 09:59 PM   #4
متشرد
عضو مُـميز
 
تاريخ التسجيل: Mar 2004
المشاركات: 4,024
تاجو يا تاجو لك كل الود وهاك الضحكة العالية دي (ههههههههههههه هيع) والله أنا كنت زهجان وقافلة معاي بالجد ولقيت كلماتك وحاجاتك الظريفة اللطيفة دي شالت التعب والزهج كلو (الله يديك العافية)
وبالمناسبة أول مرة في حياتي أسمع جملة حمارة بيضاء غاية في الجمال، وأظن لو سمعوها الحمير حا يتحولوا لحاجة تانية وأكل البرسيم يكون في تلتلة ولكن عجبني التعبير ده لدرجة إني حا أوريه أي زول أعرفو، وبعدين إنت ما ضروري تعرف واحد من الظرفاء لأنك بالتأكيد واحد منهم وبجدارة كمان.
بعدين بت عم ود عم عمة والدك دي وولد عم العم الثالث الببقى للأول أخوه ديل ما لقوا لحظات رومانسية غير مع الجرادل؟ والحمد لله ما كانت سايقة ليها غنماية وقال ليها : أديني يد الغنماية دي ( لكن صدقني مواقفك دي عجيبة وختت مواقفي في الرف ، عشان كده حردت وما حا أقدر أنزل طرائف جديدة حاليا
لك الشكر والود تاجو وتسعدنا مشاركتك القيمة
التوقيع
متشرد غير متصل   رد مع اقتباس
قديم 08-23-2005, 10:36 PM   #5
jin kalaki
عضو مُـميز جداً
 
الصورة الرمزية jin kalaki
 
تاريخ التسجيل: Jul 2003
الإقامة: كاب القشار
المشاركات: 5,281
ههههههههههههههههههههههههههههه
ههههههههههههههههه
هههههههه
ههه
ه
أحبابنا متشرد و تاجو
اضحك الله سنكم ... و الله انا حالتي زي حالتك يا متشرد كنت زهجان حبتين و قافلة معاي الليلة لكن موضوعك ده فرّجت عني شوية الله يفرّج عنك دنيا و آخرة
عندنا واحد في الحلة اخو صاحبي معرووووف زول سطلة و سكرة و ونسة ... يستحيل تقعد معاهو و ما تضحك ... بس المشكلة الذاكرة خلّلت زيما قلت و نسيت كل المواقف
موقف تاجو ذكرني واحدة قريبتنا شهادة عربية ما شافت السودان الا في الأطلس ... المهم جات السودان للدراسة الجامعية و حصلت معاها كمية من المواقف
دخلت مرة بيت حبوبتنا في الحلة لقتم معلقين فروة بتاعة خروف في الحيطة .. مشت تحكي لي الجماعة قالت ليهم مشينا لي ناس فلان و لقيناهم معلقين قشر الخروف في الحيطة.
مرة تانية بتحكي قالت الليلة جدعت (ما تنسوا تعطّطّشوا الجيم) مع حبوبة الطعمية (داك اول يوم ترمي فيهو طعمية )
المرة التالتة و دي قلبت فيها الهوبة .. حبوبتا قالت ليها ورّقي الخدرة .. المهم صاحبتك ورّقت الخدرة زي الترتيب و في النهاية خلّت العروق قاعدة و رمت الصفق في ال************ ... شفتوا ليكم محن زي دي عليكم الله؟؟؟!!!

و لكم خالص ودي و لي عودة (بس ما معروف متين)
التوقيع

jin kalaki غير متصل   رد مع اقتباس
قديم 08-23-2005, 11:07 PM   #6
متشرد
عضو مُـميز
 
تاريخ التسجيل: Mar 2004
المشاركات: 4,024
والله يا كلكي سنوني باين حا توقع من حكايات قريبتك دي (عرسوها ولا لسه؟)
وبالمناسبة مواضيعك كلها جميلة وجذابة وفوق ده كلو عضو مميز ونتمنى ليك يكتبوا بعدها مباشرة مميز جدا وبعدين من الحاجات المميزة عندك دعواتك الكاربة دي والله تأثرت جدا بها ويا ريت كل الناس في المنتدى يدعوا لبعضهم البعض "دعوة الأخ لأخيه بظهر الغيب مجابة) الله يديك العافية، لكن ما قلت لي الخضرة دي حصل عليها شنو بعدين بالتأكيد الشمس كانت حارة وحبوبتكم بتصرف أنا عارف لأنو الحبوبات بعرفوا يتصرفوا كويس بيني وبينك وأحسن مننا كمان! بعدين قشر الخروف ده مخليني هسه مقرب أقع من كترة الضحك (زي جرحني منديل) والله أضحك الله سنك أنت وسن الجميع (إن شاء الله سنون الجميع ما توقع لأنو ما بلقوا سن تضحك بعدين)
لك التحية والود أكثره أخي الجن الكلكي (بالمناسبة الإسم ده مشتق من الأغنية : إن شاء الله أجن وأزيد في الجن وإنتو جنوني يا حلوين؟) وآخرا فمازلت متأثرا بدعوتك لي "الله يفرج عنك دنيا وآخرة " ولك مثلها عزيزي آلاف من " يفرج عنك وعن الجميع دنيا وآخرة"
تحياتي وموصولة لتاجو
التوقيع
متشرد غير متصل   رد مع اقتباس
قديم 08-23-2005, 11:46 PM   #7
jin kalaki
عضو مُـميز جداً
 
الصورة الرمزية jin kalaki
 
تاريخ التسجيل: Jul 2003
الإقامة: كاب القشار
المشاركات: 5,281
حبيبنا متشرد
طبعاً قريبتنا دي بقت شفتة جداً و انصقلت صقلة تمام في السودان و هسي اظنها بي شفّعا
طبعاً هي لونا اخدر فيوم في الجامعة واحد زميلها شاغلها قال ليها (الخدرة عندك لكن) ... رجعت مستغربة البيت قالت للجماعة (انا بس عايزة قصة الخدرة دي الحكاها ليهو منو؟؟؟)
تسلم على الكلمات الطيبات يا غالي و فعلاً ياريت السنتنا دايماً تلهج بالدعاء لبعضنا البعض عسى ان يلاقي دعاءنا ساعة استجابة
و لك خالص الود
التوقيع

jin kalaki غير متصل   رد مع اقتباس
قديم 08-24-2005, 12:52 AM   #8
مالك السعيد
عضو مُـميز
 
الصورة الرمزية مالك السعيد
 
تاريخ التسجيل: Aug 2005
الإقامة: ارض المليون ميل مربع ارض العزة والكرامة والامن والسلامة سوداني الحبيب
المشاركات: 3,226
هههههه ها هههااا هههههها لا لا بس انا اموت ضحك وارجع اشوف الطرائف دي شكرااا مشرد وشلته
التوقيع
مالك السعيد غير متصل   رد مع اقتباس
قديم 08-24-2005, 11:46 AM   #9
تاجو
عضو فعال
 
تاريخ التسجيل: Jul 2005
المشاركات: 368
الأخ متشرد لك كل التحايا و للأخ الجن .. صباح الخير عليكم .. عندي موقف ظريف مع الحرامية .. واحد مكتوب في موضوع الاخ مستهبل ((كيف تتصرف لو نط عليكم حرامي )) وواحد .. في أيام الصبا .. جاء حرامي في بيت عمي الأصغر ... و اتمسك الحرامي و وقعوا أهلي فيه ضرب .. و أنا كنت في غاية الحزن عليه لدرجة اني وقفت قدام السياط و أخذت لي سوط سوطين و أنا بصرخ و بقول ليهم حرام حرام .. سلموه للشرطة يا متوحشين .. بس طبعا اتشوهت و 3 أيام ظهري وارم .. الله لايوريكم .. لكم التحايا و دمتم .
التوقيع
تاجو غير متصل   رد مع اقتباس
قديم 08-24-2005, 12:57 PM   #10
طارق سيد احمد
عضو مُـميز جداً
 
الصورة الرمزية طارق سيد احمد
 
تاريخ التسجيل: Jun 2003
المشاركات: 7,633
متشرد لك مليون تحية تقاسمها مع تاجو كلكى
بعدين الزمن ده ما بقى فى ظرفاء وكده اى حاجة
حلوة زى دى بقت تطلع من المساطيل والناس البره الشبكة

عندنا ودعمنا اول مره يشرب سيجارة مع جماعة سجمانيين كده
فضرب ليهو زى مدورة كده وبقى يهضرب ويتكلم خام بارم فالجماعة
حسو انو الزول ده لطش فساقوا حدى البيت وقالو ليهو مما تدخل
البيت اضرب ليك ملح بى ليمون عشان تفك .
قريبنا بس دخل الحوش بقى يكورك
(ملح ليمون.... ملح ليمون......ملح ليمون )
لمن الحلة كلها عرفت انو مسطول
تانى من ديك توبة الاحمر بقى ما يقرب منو
التوقيع


طارق سيد احمد غير متصل   رد مع اقتباس
قديم 08-24-2005, 01:52 PM   #11
الحلم الجميل
عضو جيّد
 
الصورة الرمزية الحلم الجميل
 
تاريخ التسجيل: Jul 2003
الإقامة: الرياض
المشاركات: 924

موضوع عسل عديل كدا ..

اها موقفي البحكي ليكم دا حصل ايام الجامعة كل يوم انا و زورق الالحان نخلص القروش ونبقى في نرجع كيف .. اها اخوكم قرر في يوم انو يحسم المسالة .. من الصباح قلت لعمار : معاك كم قال لي 5000قلت ليهو انا معاي 4000 خلاص خلي 1000 في جيبك الورا للمواصلات
اها نهاية اليوم قال لي انا عازمك قهوة باللبن في كلية العلوم .. على حسب تقديري كان انو القروش اللي عندي وعندوه انتهت قلت ليهوه عندك قروش .. قال لي موجودة اها مشينا علوم وشربنا القهوة .. قال لي بتصدق فيها سجائر كمان .. والله انا من الفرح قربت اطير اها واحنا راجعين
قلت ليهو الحمد لله الليلة اول يوم يكون عندنا حق المواصلات .. قال لي حق مواصلات شنو
ما شربنا بيهم القهوة والسجائر والله من الغيظ قربت انفجر
واتوكلنا على شارع النيل
التوقيع
[IMG]http://i.p****************.com/t1/34/530334/4/58663060.rosewithgraybackground.jpg[/IMG]
بعد ما قالت السماح
انا ليك لزمت حدي
انت اخترت البداية
اصلو ما عايز تهدي
ماشي في سكة عذاب
مابتعرف وين تودي
انت لوداير تحدي
نحنا قابلين التحدي
الحلم الجميل غير متصل   رد مع اقتباس
قديم 08-24-2005, 02:31 PM   #12
Ocean
عضو مشارك
 
تاريخ التسجيل: Jun 2005
المشاركات: 115
يديكم العافية والله ضحكتونا لمن كفا
التوقيع
أبو ميامين


Ocean غير متصل   رد مع اقتباس
قديم 08-24-2005, 11:47 PM   #13
متشرد
عضو مُـميز
 
تاريخ التسجيل: Mar 2004
المشاركات: 4,024
حبيبنا وحبة عيونا الجن الكلكي الله يديك العافية والحمد لله البقت قريبتك شفتة ، بعدين شنو الحكاية يا أخوي عقدتو البت تحفظو ليها بس النكبات البتقع فيها وتقولوا نظن بشفعها يعني حتى ما متأكدين بس متأكدين من مسألة الخدرة الليها عشرمية سنة، الله يعينها على الخدرة ( تكون طارت منها لي يوم الليلة) لك مني كل الإعزاز والود

هلا والله بمالك الحزين راجينك تتحفنا بظرفك وناسك الظراف يا ظريف ، كمل الضحك وتعال بي جاي تلقانا نحن يا نا نحن. لك التحية
حبيبنا تاجو ،،، والله يا أخوي ليك شوق وبالمناسبة إنت حكايتهم شنو أعمامك ديل ماشاء الله البلد عامرة الله يخليهم ليك بس أعمل حسابك أوع يضيعوك يوم بالدركات البقعو فيها دي، خلينا هسه من حكاية العم الصغير ورينا خبر بنت التاني وولد العم الثالث ( ناس الجردل والزير)!!! وبعدين عارفك قلبك رهيف تحن على الحرامي ( عارف ممكن نرشحك تدير منظمة حقوق إنسان)، والله الحرامي البتقبض الزمن ده الناس يتفشوا فيه كل القهر الشايفنو وفرصة الواحد يفضفض في الحرامي ده أصلو التانين ما بتقدرو بأخوي وأخوك وإيديهم طويلة وبدل تضارب الحكومة تضارب الحرامي. والجاتك في جسمك سامحتك والحجاز ليه عكاز. ودمت عزيزنا وكتر الطلة بحكاياتك اللطيفة دي وما تنسى تورينا خبر جماعة الجردل والزير ( والله لو عرفك الزول ده كتبت حكاية جردلو دي هنا إلا يلبسك جردل)
الله يديك العافية
أستاذنا طارق والله مشاركاتك لها طعم خاص والخمسمية ألف تحية الرسلتها لي بردها ليك خمسمية مليون ( يا زول مالك قارص التحية دي كده أوع تكون قايلا بتقلب دولار) وأكتر
وما عارف حكاية أولاد الأعمام ديل شنو معاكم إنت وتاجو ، أما بخصوص السطلجية باقي ليك الزمن ده يا طارق مع التلوث البيئي الحاصل ده الواحد ما بسطل بالريحة ساكت؟
تسلم يا غالي
الحلم الجميل لك كل الود وما أجمله من إسم وشتان بينه وبين إسمي المعولق ده ووالله حكايتك جميلة ( قلت لي تبخبخوا في السجاير دي وضامنين الألف جنيه بالجيب الخلفي بعدين القندفة العليكم شنو شاربين قهوة بالحليب الشاي الأحمر ده مالو؟) أنا خايف في طلبة الزمن ده جيب خلفي ما عندهم، وبمناسبة القهوة باللبن دي يا حلم يا جميل (الله يجعل أيامكم كلها جميلة) أذكر في عيد من الأعياد مشينا حضرناه في البلد زمان وكان السكر طبعا في التموين وفي الفترة دي كان مختفي والسوق الأسود كان كحلي عديل كده، (يا مان تلقى ليك سكيكرة تتضارف عليها كأنك شايل دهب وماشي وسط 50 حرامي( ما تسألوني تقولوا إشمعنى خمسين حرامي لأنها جات كده بس) المهم جاء صباح العيد وكالعادة الجماعة بعد الصلاة بقعدوا يلفوا ( ما سيجارة بنقو يا طارق) وكل ما يدخلو مكان عددهم بزيد ودخلوا بيت عمتنا في الجولة دي فقام ولدها المشارك في المسيرة (مسيرة دعم فلسطين) أصر الجماعة يشربوا شاي طبعا قعدوا طوالي وقالوا الزول ده طالما قال شاي معناها مظبط أمور السكر ولكن لما الشاي جاء كان تقيل ومر حنظل ( أنا شاي أسود أكتر من داك ما شفته كتير في حياتي دي) وطبعا الجماعة يغمضوا ويشربوا ومعاناة شديدة ( أنا ما بيت عمتي يا شباب ما جاملت أديتو ليك الواطة طوالي) وطبعا لإنعدام الكبابي ( العدد كبير ) ولد عمتنا إنتظر لحدي ما يخلصوا الجماعة ويقوم يشرب وبمجرد لمس شفتيه للشاي ( شلاليفو والتوضيح يلزم) قال : ده شنو ده؟ طبعا الوقت داك الجماعة كلهم واقفين على حيلهم عشان يطلعوا ( الشاي وقف حالهم) وقام قاليهم يا جماعة حاصل خطأ عندنا سكر. ولكن لا حياة لمن تنادي ( الجماعة بقوا ما ضامنين وخافوه يجيب الشاي المر تاني ويضطروا يشربوه.
لكم كل الود والإعزاز ( وما تغيبوا عشان نواصل)
التوقيع
متشرد غير متصل   رد مع اقتباس
قديم 08-25-2005, 08:13 AM   #14
تاجو
عضو فعال
 
تاريخ التسجيل: Jul 2005
المشاركات: 368
الاخ متشرد .. شنو يعني ما سألت عن الحمارة البيضاء الغاية في الجمال و ... ناس الجردل جابوا 3 أكواز صغيرة .. عفوا 3 أولاد صغار زي العسل .. نمشي ليك على الخيلان ... خالي ياسر يوم مسكتوا ليك ملارية ما تتمناها إلا لعدوك .. و صلعتو لو وضعت عليها كفتيرة الشاي .. تعمل ليك شاي ما بحصل .. المهم الملاريا ضربت في الراس و الهلوسة اشتغلت .. و وصلت به انه يقول نزلوا الدولاب من راسي و نزلوني من راس الدولاب .. نحن ما قدرنا نمسك نفسنا من الضحك و حبوبة تشاكل فينا .. و بعد شوية ذكروني أحكي ليكم حكاية حبوبة و الفرنسيين .. لكم التحايا و دمتم .
التوقيع
تاجو غير متصل   رد مع اقتباس
قديم 08-25-2005, 12:25 PM   #15
تاجو
عضو فعال
 
تاريخ التسجيل: Jul 2005
المشاركات: 368
[blink]ما عايزين حكاية حبوبة و الفرنسيين ..؟؟؟ ok ... [/blink]سأقص عليكم حكاية حبوبة و الزيتون .. (( مرة خالي اشترى لحبوبة زيتون .. حبوبة كانت فرحانة و تشكر في خالي .. أكلت زيتونه .. بعد شوية .. وشها قلب .. قالت لولدها .. محمود .. ياهو ده الزيتون .. ؟؟؟ خالي : ياهو يا أمي ؟؟؟ حبوبة : ما ربنا قال : و التين و الزيتون؟؟؟ مااااالو الزيتون ده مر كدي ؟؟؟ معقول ده زيتون الجنة ؟؟؟ و طبعا خالي يضحك و يقول ليها استغفري يا أمي.. شكلها كانت متوقعة الزيتون حاجة سكر .. لكم التحايا و دمتم .
التوقيع
تاجو غير متصل   رد مع اقتباس
قديم 08-25-2005, 01:32 PM   #16
شكسون
عضو مُـميز جداً
 
الصورة الرمزية شكسون
 
تاريخ التسجيل: Jul 2005
الإقامة: السودان
المشاركات: 6,856
اقتباس:
المشاركة الأصلية كتبت بواسطة تاجو
الأخ المتشرد .. موضوعك غاية في الظرافة .. صراحة لا أعرف أحدا من الظرفاء لكن عندي مواقف ظريفة .. سأرويها .. زمان أيام الطفولة سافرنا السودان .. و نزلنا في البلد .. عمي كان عندو حمارة بيضاء غاية في الجمال .. وطبعا أنا أول مرة أشوف حمارة .. عمي رابطها جوة البيت جنب شجرة نيم .. مشيت عليها و ملست راسها و لاحظت انو عيونها غاية في السواد .. فسألت عمي مين الكحل الحمارة بتاعتك .. و طبعا حتى هذا اليوم هم يضحكوا على هذا الموقف ..[color=********0033
حلوووووين حلاوة ..........
غاليييين غلاوة ..............
انتى يا تاجو قلتى لى بتعرفى الكحل قبل الحمارة؟؟؟
الله يخليك ويخلى مواقفك ... وانا اخفس كدة ,,,, واجيك راجع يا ( عضو يا مشارك ) انت.
التوقيع
شكسون غير متصل   رد مع اقتباس
قديم 08-25-2005, 02:48 PM   #17
تاجو
عضو فعال
 
تاريخ التسجيل: Jul 2005
المشاركات: 368
الأخ شكسون .. بالله عليك ماذا تتوقع أنا من المغتربين و أزيدك من الشعر بيت .. بنت أختي سافرت السودان و كان عمرها 3 سنوات .. مرة في مطبخ حبوبة شافت ذبابة كبيرة (( على مستوى)) جات عايزة تموت من البكاء و قالت لأمها مامااااااااااااااا في صرصور بيطير في المطبخ ..و فعلا كنت أعرف الكحل و الحناء قبل الحمارة ((البيضاء الغاية في الجمال)) .. و يلا.. و ينك في انتظارك.. أحكي لنا مما عندك.. لكم التحايا و دمتم .
التوقيع
تاجو غير متصل   رد مع اقتباس
قديم 08-25-2005, 04:40 PM   #18
شكسون
عضو مُـميز جداً
 
الصورة الرمزية شكسون
 
تاريخ التسجيل: Jul 2005
الإقامة: السودان
المشاركات: 6,856
ههههههههههههه ,, انشاء الله البنية ما جاتا نفسيات؟
شكسون دى طبعا يا تاجو من مشاكس ( الصورة الرمزية) ومن روحك السمحة دى بتكونى شاهدتى مشاكس وكعبول وبعد ده انتى اتخيلى الكفاوى بتاعتى كيف . .
عموما انا حأعمل filtration وأجيك راجع بالدرر . بس الصبر ولكى الود.
التوقيع
شكسون غير متصل   رد مع اقتباس
قديم 09-03-2005, 12:03 AM   #19
hamzaali
عضو مُـميز جداً
 
تاريخ التسجيل: Jun 2003
الإقامة: U . A. E
المشاركات: 55,999
الاخ متشرد والرائعين
تحية اجلال وتقدير
بالجد الواحد استمتع بالموضوع والمشاركات


و الواحد يغمس الدلو بتاعو
حصل انو كان عندنا معسكر في العطلة الصيفية في الخلا تبع التدريب العسكري ( الكديت في الزمن داك ( وطبعا كان المعسكر خارج المدينة وفي يوم كدة الجماعة كانت الونسه بتاعتهم كلها ثعابين ودبايب وقمنا نمنا بليل داك جات رشة كدة ( يعني بالعربي الفصيح مطرة خفيفة ) وانا كان عندي بطارية رابط فيها الشريط بتاع العساكر داك , وقمت باليل عاوز ادخل في الخيمة , قمت رفعت الفرش بتاعي و معاهو البطارية والشريط ده جا نابل ( طاير يعني ) في اللحظة الفكيت ليك الفرش ده وقمت جار ولى التعترني البطارية كانت ماسكة فيني انا جارى والشيط ده وراي لم شفت الشغلانية و راي وراي قمت فكيتة ليك كوريكه واااااااااااااااااااااااااي , الجماعة جو جارين يا زول مالك قلت ليهم الدبيب باليل داك الجماعة قامو فتش فتش لي دبيب اخر حاجة لا لقو دبيب ولا حاجة ,,,, اها انا باليل داك قمت جريت الشريط( وبفكر في الشغلانية لقيت ليك الموضوع لا فيهو دبيب ولا حاجة , بس ده الشريط المروبط في البطارية ( ونمت بي الموضوع ) ولى يوم الليلة ما حكيتها لى زول الا في البوست ده
التوقيع
لدي من الفكر الايجابي المتجدد كم يجعل من الحاسدين اضحوكه

التعديل الأخير تم بواسطة hamzaali ; 09-03-2005 الساعة 12:30 AM
hamzaali غير متصل   رد مع اقتباس
قديم 09-03-2005, 11:19 AM   #20
النيل الأزرق
عضو فعال
 
الصورة الرمزية النيل الأزرق
 
تاريخ التسجيل: Aug 2005
الإقامة: الرياض
المشاركات: 484
(التقروقة: مصلاة مصنوعة من السعف والسعف من النخلة أو الصورة والصورة هي شجرة الدوم عندما تكون صغيرة)

هي (( تبروكة )) أو (( تبروقة )) ،، و ليست تقروقة ،،
النيل الأزرق غير متصل   رد مع اقتباس
قديم 09-03-2005, 09:46 PM   #21
متشرد
عضو مُـميز
 
تاريخ التسجيل: Mar 2004
المشاركات: 4,024
تحيات عطرة لحمزة علي وحكايتك لذيذة لكن يا أخوي القصة دي داسيها السنين دي كلها؟
أها وحكيتها في البوست ده وظني ما في زول بعرفك لكن لومك بي الواحد إن طال الزمن أو قصر بلم فيك ويفت الحكاية دي.
أهلا بالنيل الأزرق
شكرا على التوضيح والمداخلة ، لكن فقط أقول لك إنها عندنا في بلدنا "تقروقة" ويا ليت الأعضاء بتنوع مساقط رأسهم يأتوا إلى هنا والكل يوضح اللفظة عندهم حتى نصل للفظ واحد، ومشكور أخي
التوقيع
متشرد غير متصل   رد مع اقتباس
قديم 09-03-2005, 10:56 PM   #22
ريح الشمال
عضو فعال
 
تاريخ التسجيل: Feb 2005
الإقامة: السودان
المشاركات: 434
تحية طيبة المتشرد وجميع الظرفاء
اول حاجة انا ضحكت لمن قربت اموت والله يجازيكم حكايات الظرف والظرافة تعيش مع الواحد في كل تفاصيل حياتو يعني معظم الناس الاحتكيت بيهم من زمن الطفولة كانو ناس نكتة حتي كان عندنا واحد قريبنا ملقبنو ظرافة عليه رحمة الله وكمان حكايات السكرجية والسطلنجية والمستهبلين ومن اروع الحكايات واحدة حكاها لي صديقي ومعلمي عن طفولتهم قال مرة كانو بيلعبو في لعبة هو لبلب ودي لعبة تتلخص في انو الاطفال يكونو واقفين في خط واحد ويكون واقف قدامن علي بعد كم متر كدا واحد منهم اها الواحد دا يقوم يكتب حاجة في الواطة ويغطيها بي يدو عشان ما يشوفوها ويقوم يوريهم مجال الكلمة المكتوبة ويسالم منها يعني مثلا يقولهم الكلمة حيوان فيبدو هم يخمنو واحد يقول كلب وواحد يقول خروف وكدا يعني وهو يرد في حالة الاجابة الخطأ كضبا كاضب يعني غلط لغاية ما يجاوب واحد منهم الاجابة الصحيحة فيقوم يقولو شد واركب يعني امسك اي واحد منهم واركب فيهو زي الحمار والجميع يقومو جاريين وصاحب الاجابة الصحيحة يقبض واحد ويركب في ضهرو ويوصلو لغاية الخط . اها نرجع للقصة قال كانو بيلعبو في اللعبة دي وكان معاهم ضيف من العاصمة فقام الزول الفي الخط قالهم الكلمة نوع من الاكل والجماعة شبكو ليك خدرة رجلة بامية سبروق وهو صاقع كضبا كاضب قام الضيف المن العاصمة قال سجك قام الزول الفي الخط رد عليهو وبي زعل ياخي قلنا لك اكل اكل يا حيوان !! وهنك الكثير جدا من المضحكات ارجو اني الاقي الزمن المناسب لي سردها .
التوقيع
الذ من طعم الخضوع علي فمي السم النقيع
ريح الشمال غير متصل   رد مع اقتباس
قديم 09-03-2005, 11:23 PM   #23
جوهر
عضو جديد
 
تاريخ التسجيل: Aug 2005
المشاركات: 17
الموقف دة حصل في دولة من دول الغرب والحكاية إنو في سوداني إتزوج ومشى بأولادو في تلك الدولة الغربية وفي يوم من الايام المرأة قالت تعمل شوية طقوس سودانية وقامت ولعت الدخان وقعدت تتدخن وشريط ندى القلعة شغال ورجعت بها الذكري للأيام الحلوة في السودان بين الأهل والاحباب وأثناء ماهي قاعدة فإذا بأصعدة الدخان تتسرب من الشباك وشوية شوية الدخان بيزيد حتى إنتبه المارة وقالوا أكيد في حريق في البناية ونبهوا الجيران والجيران إتصلوا بالمطافي وبتنا حتى تلك اللحظة عايشة مع ندى القلعة وذكريات السودان وناس المطافي جو ودقو الباب وعشان الشريط كان شغال بسوط عالي ما سمعت دقة الباب وفي النهاية إتطروا إنو يكسروا الباب وفعلا كسروا الباب فإذا بها جالسة على أصعدة الدخان فأخذوها إلى الشرطة وفتحوا بلاغ تحت مادة الشروع في الإنتحار وإتصلوا براجلها وحضر على الفور وعشان يقنع الجماعة ديل إنو الحكاية دي من طقوس السودانين مافي فائدة حتى تم الإتصال بالسفارة وحضر مندوب السفارة وأقنعهم بحقيقة الأمر وتم الافراج عن هذه المرأة السودانية .
جوهر غير متصل   رد مع اقتباس
قديم 09-04-2005, 10:02 PM   #24
متشرد
عضو مُـميز
 
تاريخ التسجيل: Mar 2004
المشاركات: 4,024
حبيبنا ريح الشمال لك التحية والود
وشكرا على الطرفة الجميلة هههههههه ولحدي هسه بضحك لأني متحير والحمد لله زول الخرطوم ماقاليه: بيرجر ولا بروست كان حايقوليه يا نعجة ويلحقو عكاز في رأسو. لك التحية وما تفوت خليك بي جاي لأنو الظاهر عليك مخزن كمية، طالما متذكر ليك لعبة من سنة حفروا البحر. لكن بس سؤال على خفيف كده يا أخوي: ريح الشمال دي الهبباي ولا قاصدبيها ريح شمالية شرقية ولا قاصد همبريب الشمالية؟ لك الود والتحية
جوهر تحياتنا ووينك يا بطل إفتقدنا التحف البتدينا ليها من كم يوم، لكن ما قلت لي ، طبعا المرة بالتأكيد ما حافرة حفرة في السيراميك!!! وذكرتني بواحد صديقنا جاب زوجتو بلاد الغربة والتشتت دي وقال لي نمشي مشوار، أتاريه ماشي للنجار ولقيناهو مجهز ليهو الكرسي وما عارف الكرسي عامل كيف كيف، والنجار أندونيسي ومستغرب جدا في الحكاية، والكرسي ده لي شنو أساسا!!! فزولتك دي تكون عاملة ليها كرسي زي بتاع صاحبنا ده. الله يديك العافية وما تغيب تاني ولك التحية
التوقيع
متشرد غير متصل   رد مع اقتباس
قديم 09-05-2005, 12:53 AM   #25
ريح الشمال
عضو فعال
 
تاريخ التسجيل: Feb 2005
الإقامة: السودان
المشاركات: 434
ِِتحياتنا يا متشرد
حقيقة بيتكم دا عجبني والظاهر عليك حا تقوم تستضيفني كم يوم كدا وكتر الشاي
اول حاجة بالنسبة لي اسمي دا انا ما حا حا اشرحلك كتير لاني لو قعدت اشرح لي اي زول يسالني من اسم ولا لقب حا اقعد اشرح عمرو كلو لاني اكتر زول عندو اسماء والقاب في الدنيا ودي طبعا مبالغة لكن ما شديد المهم اول حاجة انا اسمي مركب من اسمين زي عادة ناس بلدنا لكن اهلي خلو الاسمين ديل وبينادوني بي اسم تالت وناس قريتنا بعضهم بينادوني بي لقب اسرة ابوي وبعضهم بي لقب اسرة امي اما اصحابي فهم ملقبني بي اكتر من سبعة القاب تانية دا بالاضافة لي انو معظم البعرفم برة بلدنا بينادوني بي اسم القبيلة او اسم بلدنا!! عليك الله دي ما مشكلةالمفروض تتناقش في مجلس الامن؟؟ يعني اي زول ينادي زول في الشارع انا اتلفت!! المهم ريح الشمال دي تعني كل المعاني الانت قلتها دي الا الهبباي لانو دي قالو بيخرب الزراعة في طوكر وانا بحب الزراعة . الشمالية الشرقية دي طبعا جافة زيي في معظم الاحوال اما الهمبريب فممكن تعتبرو دا انا زاتو في حالة الروقان.
كدي سيبك من الكلام دا وتعال احكيلك عن شخصتين من اظرف الشخصيات القابلتني واحد سكرجي والتاني سطلنجي اها الزول الاول عندو هوايتين ( دبل هواية ) يسكر ويخش السجن يعني اهم حاجة عندو يحاكموهو ويدخلو السجن وقالو الزول دا لما يكون طالع من السجن يعمل علامة في المكان الكان بينوم فيهو ويقول للمساجين دا مكاني مافي زول ينوم فيهو اسي انا بجيكم راجع . الناس في البلد كلهم بقو يعرفوهو وما يشتغلو بيهو حتي ناس الشرطة ادوهم تعليمات انهم ما يقبضوهو اها مرة الزول دا مشي سكر ومشي لي ناس الشرطة في القسم عشان يقبضوهو و ما اشتغلو بيهو مشي لي ناس الامن شتمن ما اشتغلو بيهو مشي للقاضي في البيت برضو ما اشتغل بيهو ولمن قنع قرر يمشي البيت وفي الطريق جا ماري بي قسم المطافي وجاتو فكرة دخل القسم لقي عريف قاعد ودور فيهو شتيمة وقالو انت ادوك شريطين ساكت اسي عليك الله عمرك طفيتلك نار؟؟ مقضيها كلها كشتينة وضمنا اها العريف زعل شديد ووداهو القسم واصر عليهم انهم يفتحولو بلاغ ورجعوهو السجن تاني !!
السطلنجي خليهو مرة تانية عشان انا تعبت من الكتابة.
التوقيع
الذ من طعم الخضوع علي فمي السم النقيع
ريح الشمال غير متصل   رد مع اقتباس
قديم 09-05-2005, 09:57 PM   #26
متشرد
عضو مُـميز
 
تاريخ التسجيل: Mar 2004
المشاركات: 4,024
عزيزنا العزيز ريح الشمال لك التحية والود
يا زول أنا تعبتك وتعبت نفسي (التحشر لزومو شنو قايم أسألك من معنى إسمك؟)
والله زولك ده ظريف بالجد ويشبه زولي في مسألة السكر والمشك دي لكن داك بيتجلد بس!!!
أها نديك واحدة في أيام حكومة الأحزاب وبطلها واحد جنو سكر من سكان الإمتداد بالخرطوم، أها زولك ده وازن راسو وداقي الظلط وكلما يشوف ليه نور عربية يأشر، المهم وقفت ليه عربية ما عرف إنها بتاعة شرطة إلا بعد ركب وشاف البلد في البوكس كلها كاكي، أها الجماعة سألوه بعفوية: ماشي وين؟ قاليهم: حا أكون ماشي وين يعني؟ ما القسم!!!
نرجع شوية لي زولنا القديم داك وظرافتو، مرة الجماعة بتكلموا عن الموت، وصاحبنا مصنقر يسمع بس، وفلان يقول الموت مخيف والتاني يقول لكن محتم وراجينا، فقام قال: أصلو الموت ده أكان ما ببدأ بالكرعين زول كان رجاه مافي!!!
لك التحية أختى تاجو (شهرزاد النيلين) حتى لو الجراب فضى مرّي علينا طالما نحن أديناك حق الفيتو وحق الشراكة في الحكم، لك التحية والود.
أها يازول يا ريح الشمال تقعد فوق عزك وأكان ما شالك البوست ده نشيلك فوق راسنا
وحبابك بدل الألف مليار والله يديك العافية
التوقيع
متشرد غير متصل   رد مع اقتباس
قديم 09-06-2005, 12:47 AM   #27
ريح الشمال
عضو فعال
 
تاريخ التسجيل: Feb 2005
الإقامة: السودان
المشاركات: 434
كل الشكر حبيبنا متشرد مع اني ما قاعد اريد كلمة حبيبنا دي لكن قول اخوي متشرد كمان بقينا نصاحب الشماشة ما مهم المهم انا متكيف خلاص من ترحيبك بي في بيتك دا اوع تزهج مني لو طولت
اها نرجع لي زولنا السطلنجي طبعا هو من ناس الخرطوم لكن ما من الامتداد من الكلاكلة ودا دينو وايمانو بنقو اها دا مرة يحكيلي قالي تعرف انا والله كرهتي في الدنيا الناس البيخلو ابواب بيوتم فاتحة بالليل قلتا لو مالك ومالم ؟ قالي مرة جاي ماشي في شوارع الكلاكلة ومصقوع صقعة جد والناس البيوتم مفتحة الضو بيجي مارق بي الباب ويعمل خط بتاع ضو في الشارع وهو علي حسب السطلة مفتكر الخطوط دي موية مع انو الدنيا ما كانت خريف و زولك مكفكف بنطلونو ويشيل وينط كل ما يلاقيلو ضو ينط لمن وصل البيت روحو دار تمرق
ومرة تاني قال جاي من امدرمان ماشي الكلاكلة وبرضو مصقوع اها ركب في الحافلة والقزاز بتاع الشباك نضيف لمن هو ما شايفو بعدين زولك شال السفة من خشمو وزناها بالشباك والسفة لصقت في القزاز وزولك لمن وصل البيت ورقد نام وهو يفكر في السفة دي مالا اتعلقت في الهوا ؟؟؟؟؟؟؟؟؟؟؟؟. ههههههههههههه
ونرجعلك تاني
التوقيع
الذ من طعم الخضوع علي فمي السم النقيع
ريح الشمال غير متصل   رد مع اقتباس
قديم 09-06-2005, 10:24 AM   #28
تاجو
عضو فعال
 
تاريخ التسجيل: Jul 2005
المشاركات: 368
الأخ متشرد ..لك كل الاحترام .. و الله أهلنا حلوين و مواقفهم الحلوة أكثر من شعر الرأس .. و التحية موصولة للأخ ريح الشمال على المواقف الحلوة... و اليكم ما يلي .. خالي مرة جاب معاه فوج فرنسي البلد ..طبعا عشان يشوفوا حياة الارياف و البساطة .. و طبعا أول حاجة كلم أمه (( حبوبة)).. و قال ليها معاي ناس ضيوف من فرنسا و حبوبة أبعد مكان بتعرفوا هو الخرطوم .. المهم خالي بدأ يدخلهم على حبوبة ... و حبوبة في الأول سلمت باندهاش و بعدها سلمت و هي كاشة و بعدين جرت خايفة و قالت بسم الله دين ناس ولا كدايس .. الشي عيونهم خضرة و زرقة .. جنوني .. و دخلت الغرفة الثانية و قفلت عليها و تقرأ في القرآن لحد لما الفرنسيين مشوا.. و لي عودة مع اخوانا الممتحنيين الجامعة و طرائفهم . لكم التحية و دمتم .
التوقيع
تاجو غير متصل   رد مع اقتباس
قديم 09-06-2005, 11:15 AM   #29
الابنوسي
عضو جيّد جداً
 
تاريخ التسجيل: Jun 2005
الإقامة: (نبض القصيد)
المشاركات: 1,833
متشرد والعقد الفريد
تحياتي ليكم
وقصه خيفة كدة

في احدى ايام الامتحانات في داخلية جامعه الخرطوم كنا كاالعادة نجتمع للاكل والشرب معا
وفي ايام الامتحانات وبعد ما تعشينا وفي طريقنا للداخلية واحد من اخوانا قال ليهم يا شباب انتو نسيتو العصير ولا شنو الدنيا امتحانات لاذم نكتر من السكريات عشان السهر
نطة اخونا الظريف قال ليهو هوي يا انت هو نحن لو بنشرب سكريات دا حالنا .
والله نحن السكريات دي ما بنضوقة الا في المعجون .
ههههههههههههههههه

يا حليل معجون سيجنال الطاعم
التوقيع
لمْ أكُنْ فيِ زمٌنْ القُبح قَبِيحاً ..
إنـْـما كُنـتُ َصـدِيـقْ الياسِمينْ ..
الابنوسي غير متصل   رد مع اقتباس
قديم 09-06-2005, 10:21 PM   #30
متشرد
عضو مُـميز
 
تاريخ التسجيل: Mar 2004
المشاركات: 4,024
كل الود ريح شمالنا الحبيب ولومك بي تقعد أكان داير فوق رأسي ده (ما قلنا نحن أسياد بلد نقعد نقوم على كيفنا وفوق رقاب الناس مسلط سيفنا) وبعدين ما عندك مشكلة ممكن تخليها متشرد بس بدون حبيبنا وبدون الإكسسوارات التانية، وبعدين كويس الزمن ده تلقى ليك شماسي تصاحبو (في زول فايق لي زول الزمن ده؟) بعدين (دينو وإيمانو) القلتها دي مش بتاعة شماسة؟
قلت لي السفة إتعلقت في السماء هههههههههههههههههههههههههههههه والله ده موقف طريف جدا، بس زولكم ده حكايتو شنو؟ (ده رأس ولا كمونية) سيجارة حمراء وخضراء وبعد ده داير يملأ خشمو؟ لك الود والتحية ومرحب بيك مرحبات كتيرات وتعال راجع وأنا راجيك
التوقيع
متشرد غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 05:19 PM.


Powered by vBulletin® Version 3.8.7
Copyright ©2000 - 2020, vBulletin Solutions, Inc. Trans by
Protected by CBACK.de CrackerTracker